Святцы: Соообщество Православных Прихожан


Акафист Пресвятой Богородице пред иконой «Жадовская» («Казанская») (Акафисты ко Пресвятой Богородице)

Не утвержден для общецерковного использования.

Кондак 1

Избраннице Бога Вышняго, Заступнице Усердной рода христианскаго, державным омофором благодати Господней, аки ангельскима крилома, покрывающей страну нашу Российскую ради веры ея православныя, благодарственно воспоем, радующеся о явлении иконы Твоея Казанския в веси Жадовстей, и помощи Ея просяще, воззовем:

Радуйся, Богоблагодатная Марие, святорусския земли хранительнице.

Икос1.

Ангельское пение на небеси приемлюще, не отвратися от наших хвалебных гласов на земли, Милосердная Заступнице, во умилении грешных сердец Тебе возносимых, егда архангельскому гласу подражающе, взирая на Твой образ пречестный, милостию Человеколюбиваго Бога земли Симбирстей дарованный, воспоем:

Радуйся, Богоотроковице Чистая; радуйся, голубице Богоизбранная.

Радуйся, Мати Христа Спаса; радуйся, милосердая Мати обидимых и гонимых.

Радуйся, покрове небесный земли Российския; радуйся, Ангелов Царице и мира Владычице.

Радуйся, не отвергающая похвалы грешных устен; радуйся, заступающая людие христолюбивыя.

Радуйся, небесных сил Воеводо; радуйся, Путеводительнице воинств православных.

Радуйся, явлением иконы пречудныя верных возрадовавшая; радуйся, ангельский чин возвеселившая.

Радуйся, Богоблагодатная Марие, святорусския земли хранительнице.

Кондак 2

Видяще, Всеблагая Целительнице, с высоты Иерусалима горняго скорбь раба Божия Тихона, тяжце страждущаго ножней болезнию, и явилася еси ему во сне, чудо исцеления обещавая, да благодатным явлением в вере утверждаемый, Христу Богу воспоет: Аллилуиа.

Икос 2

Разумевающе двукратное явление Царицы Небесной, ради слезных прошений болящаго дарованное свыше, Тихон, внимая повелению Богоотроковицы, со одра, идеже недвижим бысть, возставше и со мнозими трудами притекше к реце Самородке и воспевши слезною молитву образу Казанския Богородицы, омывше нозе в водах, внезапу узрел еси икону Твою, Владычице, на водах стоящую и небесным светом возсиявающую. Сия добре ведуще, слезноумиленно воспеваем Ти:

Радуйся, скорбных утешающая во всякой печали; радуйся, исполняющая земныя воды небесной благодати.

Радуйся, слезныя прошения скоро исполняющая; радуйся, людем христолюбивым образы Твои являющая.

Радуйся, Рождшая Врача душ и телес; радуйся, милостивая Целительнице всяких недугов.

Радуйся, яко всякаго, к Тебе притекающаго, верою укрепляеши; радуйся, яко просящих Тя от всякаго зла спасаеши.

Радуйся, освятившая источницы водныя явлением Иконы пречудныя; радуйся, освятившая души пением хвалебных молений.

Радуйся, приемлющая молитву самых отчаянных грешников; радуйся, соделывающая благодатию Господней подвижников благочестия.

Радуйся, Богоблагодатная Марие, святорусския земли хранительнице.

Икос 3

Силою Вышняго сотворила еси, Богомати Всепетая, мнози чудесы и знамения, от иконы Твоея явленныя, ея же Тобою исцеленный Тихон принесл еси людем и священнику, радостно воспевая Богови: Аллилуиа.

Икос 3

Имуще богопросвещенныя души, людие верныя основаша под благодатным покровом Твоим, Владычице, иконы обитель иноческую, идеже Ты, Пресвятая Дево, девствующим пристанище небурное даруеши, верных во православии укрепляеши, помраченных тьмою неверия – богопросвещаеши, всех подвизая пети Тебе:

Радуйся, иноческих чинов Небесная Покровительнице; радуйся, духовная наша Целительнице.

Радуйся, просветившая тьму неверия Светом Сына Твоего; радуйся, разгоняющая мрак ересей лучами чудес от благодатныя иконы.

Радуйся, тихая обитель в бурнем море житейском; радуйся, якорь спасения посреде треволнений суетнаго мира.

Радуйся, покрове девствующих и Богу посвященных заступление; радуйся, о мире всего мира теплое моление.

Радуйся, преподобных в подвизех укрепление; радуйся, в любых бедах и напастех верных спасение.

Радуйся, просвещающая помыслы благодатию Богопознания; радуйся, обновляющая души молитвою огневидною.

Радуйся, Богоблагодатная Марие, святорусския земли хранительнице.

Кондак 4

Буря разрушения и крамолы, безбожницами воздвигнутая, достигоша стен обители Жадовския; Церковь же православную постиже огненное искушение: храмов и обителей разрушение, христолюбивых людей убиение; святынь поругание и сожжение. Ныне же мы о сем слезно памятующе, воззовем Богови: Аллилуиа.

Икос 4.

Слышаша иноцы Жадовския Казанския обители о пришествии безбожниц лютых, хотящих Твою чудотворную икону отъяти и сожещи. Монаси возопили в скорби глубоцей к Заступнице рода христианскаго. Сего ради и мы, многогрешныя, слезно вопием Тебе, Богородительнице, под державный Твой покров прибегающи:

Радуйся, от безбожных небесное ограждение; радуйся, посреди гонений святынь чудесное сохранение.

Радуйся, хранящая незримо икону Твою с верою хранящих; радуйся, Победительнице падших духов, на ны брани возводящих.

Радуйся, со Христом вечно царствующая; радуйся, земных, к Тебе вопиющих, не оставляющая.

Радуйся, Избавительнице от всяких зол; радуйся, подательнице Божественныя благодати.

Радуйся, избавление плененным принесшая; радуйся, верных во узах темничных укрепившая.

Радуйся, новомучеников Российских похвало; радуйся, обители Жадовския покрове небесный.

Радуйся, Богоблагодатная Марие, святорусския земли хранительнице.

Кондак 5

Боготечная звезда – икона Твоя, о Богомати, сокрылася еси от мира суетнаго, верныя людие хранимая от зловерных лютых безбожниц. Веру же хранящим Ты даровала еси воспевати Господеви: Аллилуиа.

Икос 5.

Видевше от веры отступление, идолом поклонение, Ты, Мати Бога Вышняго, сокрыла еси образ Твой чудотворный на седмьдесят лет, доколе не принесут людие покаяние о гресех богоотступления, поразивших землю русскую. Милосердуя же о нас, грешных, ныне возсиявает во храмех Симбирска-града икона Твоя достославная и чудоточивая. Зряще сие чудо Божия милости, грешными устами и сокрушенным сердцем Тебе воспоем:

Радуйся, яко и ныне милостьми пребогатыми нас даруеши; радуйся, яко чудоточения от образа пречестнаго источаеши.

Радуйся, храмов православных присносиятельная лампадо; радуйся, Церкве Российстей звездо и душам отрадо.

Радуйся, Сама Себе от зловерных пречудно хранившая; радуйся, почитающих Тя от тлетворных ересей избавившая.

Радуйся, обновляющая молитвами Твоими храмы душ наших; радуйся, незримо отвращающая нас от всякаго греха.

Радуйся, древле пророческих писаний неложное исполнение; радуйся, преподобнаго Гавриила, исповедника Христова среди гонений сохранение.

Радуйся, Пречистая, Радосте наша небесная; радуйся, мрак уныния в радость претворяющая.

Радуйся, Богоблагодатная Марие, святорусския земли хранительнице.

Кондак 6

Проповедницею покаяния явися икона Твоя, о Богородительнице, в Симбирске и весех близлежащих, егда принесена бысть в соборный храм града сего, образу «Неопалимыя Купины» посвященный, идеже множество людей собрашася: монаси и мирстии, священницы и болящия, стар и млад, со слезами поюще Господеви: Аллилуиа.

Икос 6.

Возсиявши свет истинныя веры и отгнавши зловерие языческое во земле Симбирстей: ныне, яко древле, людие приносяще покаяние, аки вторыя крещение приемлюще, под Твоим благодатным покровом, Заступнице наша усердная. Сего ради вопием Ти слезноумиленныя благодарения:

Радуйся, духовная святыня земли Симбирския; радуйся, Державная Владычица земли Российстей.

Радуйся, зловерие иудейское и мудрования еретиков Сыном Твоим посрамившая; радуйся, велий и достохвальный образ Твой от рук неверных сохранившая.

Радуйся, благоугодно приимающая поклонение грешников кающихся; радуйся, претворяющая сих в подвижников благочестия.

Радуйся, языком иноплеменным непостижимая, неодолимая преградо; радуйся, всем благоподвизающимся небеснодуховная наградо.

Радуйся, Живоносная Купель крещения втораго земли Русской; радуйся, звездо, Светом Христовым возжженная во обители Жадовстей.

Радуйся, Иисус Христовым Рождеством исполнившая истину; радуйся, тем посрамившая и отгнавшая лесть идольскую.

Радуйся, Богоблагодатная Марие, святорусския земли хранительнице.

Кондак 7

Хотящу защитити народ православный от нашествия иноплеменных, вновь явила еси, Преблагословенная Дево, образ Твой всеславный, до времени сокрытый в дому некоего богобоязненнаго иереа. Ныне же иконе Твоей, христолюбивым людем дарованной аки залог спасения, православнии, притекающе, вопиют Богу: Аллилуиа.

Икос 7.

Новых чудес и знамений от Твоея иконы чающе получити, о Богоблаженная Отроковице, пред Ней припадаем и на милосердие Божие уповая, слезно в покаянии к Тебе вопием:

Радуйся, не оставившая нас посреде искушений и печалей; радуйся, отъявшая души наша из тьмы неверия.

Радуйся, обращаящая к покаянию и самых отчаянных грешников; радуйся, простившая людие от веры отпавшия.

Радуйся, святорусских обителей возрождение; радуйся, во Христе Иисусе Руси обновление.

Радуйся, укрепляющая державу православную; радуйся, покрывающая милостьми страну Российскую.

Радуйся, градов наших Нерушимая Стено; радуйся, храмов наших покрове, ширший облака.

Радуйся, свобождающая плененных. радуйся, разрешающая от уз греховных.

Радуйся, Богоблагодатная Марие, святорусския земли хранительнице.

Кондак 8.

Странно и умилительно неверствующим было слышати, како икона Твоя животворным источником Духа явися: обитель иноческую из праха возставила еси; духовно прокаженныя исцелила еси; лежащих на одре смерти духовныя оживила еси и всех, притекающих к ней, сподобила еси в покаянии неложном и благоухании духовном воспевати Богу: Аллилуиа.

Икос 8.

Всю страну нашу Российскую, ея грады и веси освятила еси, Владычице неба и земли, явлением чудотворных икон Твоих; воздвизая окрест я обители и храмы православныя: тем же наши души подвигаеши к покаянию пением таковых:

Радуйся, землю Русскую образами с небеси явленными освятившая; радуйся, тьму неверия сердец наших Сыном Твоим просветившая.

Радуйся, апостолов похвало и мучеников славо; радуйся, новомучеников обители Жадовстей венцев небесных сподобльшая.

Радуйся, знаменьми благодатными веру Христову умножившая; радуйся, образ предивный на стене разрушенныя обители явившая.

Радуйся, неверных от неверия ко Христу обратившая. радуйся, Христово стадо добре упасшая.

Радуйся, Путеводительнице посреде мрака страстнаго мира; радуйся, воительнице на духов злобы поднебесной.

Радуйся, яко просящим Тя с верою богопросвещение подаеши; радуйся, яко Тобою венцев славы вернии сподобляются.

Радуйся, Богоблагодатная Марие, святорусския земли хранительнице.

Кондак 9.

Херувимов всех Честнейшая и серафимов всех Чистейшая явилася еси, Богообрадованная Дево Марие, Бога бо зачала еси во плоти Своея, Создателя всех возсоздала еси во утробе Твоей, в руцех содержала еси Содержащаго всех и вся; тем же, яко Присноблаженную и Пренепорочную Богородицу Тя величающе, Твоими молитвами Богу вопием: Аллилуиа.

Икос 9.

Ветия многоречивыя, земная мудрствующе, небеснаго же не разумеюще, недоумеют бо достойно хвалити Тя, Пресвятая и Всесвятая Мати Дево; разум не постигает, язык изнемогает пети Тя, Богородице; обаче Благая Мати сущи, приими и от нас архангельское радование, Тебе возносимое:

Радуйся, Благодатная Марие, рождшая Спаса душ наших; радуйся, яко Господь с Тобою.

Радуйся, Богоотроковице, яко на Твое смирение призре Господь; радуйся, яко Ты обрела благодать у Бога.

Радуйся, Благословенная в женах; радуйся, яко блажат Тя вси роди.

Радуйся, Заступнице Усердная рода христианскаго; радуйся, Родительнице Бога Вышняго.

Радуйся, Державная Правительнице страны православныя; радуйся, небес Царице и земли Владычице.

Радуйся, утробо Боговоплощения. Радуйся, живый Храме Духа Святаго.

Радуйся, Богоблагодатная Марие, святорусския земли хранительнице.

Кондак 10.

Спасение дарующе погрязшим во тьме грехов, ересей и неверия, явила еси чудесы от иконы Твоея во граде Симбирске и весех земли тоя; дабы цельбы и утешения от образа Твоего получивше, людие в покаянии возопили Богу: Аллилуиа.

Икос 10.

Стена еси необоримая державе Российстей, милостей источниче животворящий: победо воинств православных, с небесе подаваемая, неверных языков грозное устрашение. Тем же Тебе благодарственно вопием:

Радуйся, посрамление языков; радуйся, оградо и прибежище верных.

Радуйся, тихое пристанище иночествующих; радуйся, предградие от духов нечистых всем, хранящим целомудрие.

Радуйся, росу неботочивую благоуханнодуховную от образа Твоего источающая; радуйся, от неверных и беззаконных дел нас ограждающая.

Радуйся, благое исполнение богоугодно подвизающихся; радуйся, умиленная Отрадо, духовно сердца орошающая.

Радуйся, источниче неисчерпаемыя благодати, слезами души кающихся окропляющий; радуйся, саде райския земли обетованный, покров духовныя прохлады дарующий.

Радуйся, любовию Отца Небеснаго сердца верных веселящая; радуйся, милосердие Человеколюбца Христа Спаса приклоняющая.

Радуйся, Богоблагодатная Марие, святорусския земли хранительнице.

Кондак 11.

Пение благодарственное от нас, недостойных, Владычице Милостивая, приими, ибо от множества грехов сляцаеми, не возможем чисто воззрети на образ Твой достославный: пречестную икону Казанскую Жадовския обители; но надеющеся на человеколюбие крайнее Милосердаго Спаса, воспоем Ему, яко Сыну Твоему и Богу нашему: Аллилуиа.

Икос 11.

Светоприемную свещу, исполненную светлостей трисолнечных, тако зрим Твою предивную икону, Богородице Богоблагословенная: та бо токи невещественнаго огня источает, сердца человечестии облагоухая покаянными слезами, приводящими ко спасению всех, поющих Ти:

Радуйся, небесный лучу Солнца Истины Иисуса Христа; радуйся, Дево Неискусобрачная, Матерь Бога Слова.

Радуйся, Невесто Неневестная, Кроткая Голубице; радуйся, Царя Небеснаго достойная Избраннице.

Радуйся, небесная заре нашего спасения; радуйся, Державная Владычице, умов наших просвещение.

Радуйся, скорбящих сердец упование; радуйся, душ и телес освящение.

Радуйся, Чаше, приосененная Святым Духом; радуйся, Чаше, от Нея же черплем небесную радость.

Радуйся, Богоблагодатная Марие, святорусския земли хранительнице.

Кондак 12.

Благодатию исцелений и духовных и телесных прозрений облагоухала еси, Мати Божия, людие православныя во храмех и обителех, идеже Ты пребывала еси со святою Твоею иконою, низводяще милости Бога и Спаса нашего на поющих Ему: Аллилуиа.

Икос 12.

Воспоем Пресвятую Деву: хвально и препрославленно Имя Твое, Госпоже Марие; несть числа чудесы, проистекающия от Тебе – Животворнаго Источника Божиих милостей: велие множество икон Твоих, Заступнице наша, исполняют сердца наша умиления и богохваления в пениях молебных:

Радуйся, всемощная христиан Защитнице; радуйся, неисцелимых и безнадежных безмездная Целительнице.

Радуйся, образе кротости и смирения, превысший небес; радуйся, бисере чистоты и девства, чистейший светлостей солнечных.

Радуйся, упование христиан непостыдное; радуйся, надежде благ вечных.

Радуйся, яко Благая милосердия двери отверзаеши; радуйся, яко Спасительнице от внезапныя смерти избавляеши.

Радуйся, праведнаго гнева Божия умилостивление; радуйся, и по смерти нашей крепкое заступление.

Радуйся, дарующая спасения нечаянную радость; радуйся, подающая верным сердцам духовную сладость.

Радуйся, Богоблагодатная Марие, святорусския земли хранительнице.

Кондак 13.

О, Всепетая Мати, рождшая Всесвятаго Бога Слово, приими ныне малое сие молебное пение, и величия ради милосердия Твоего и неисчерпаемаго моря милостей Твоих, не остави нас во гресех погибающих, но спасения ради подаждь благое совершение прошений наших, телеса исцеляющи, души очищающи и Царствия Небеснаго сподобляющи всех, православно поющих Богу: Аллилуиа.

Этот кондак читается трижды, затем икос 1-й и кондак 1-й.

Икос1.

Ангельское пение на небеси приемлюще, не отвратися от наших хвалебных гласов на земли, Милосердная Заступнице, во умилении грешных сердец Тебе возносимых, егда архангельскому гласу подражающе, взирая на Твой образ пречестный, милостию Человеколюбиваго Бога земли Симбирстей дарованный, воспоем:

Радуйся, Богоотроковице Чистая; радуйся, голубице Богоизбранная.

Радуйся, Мати Христа Спаса; радуйся, милосердая Мати обидимых и гонимых.

Радуйся, покрове небесный земли Российския; радуйся, Ангелов Царице и мира Владычице.

Радуйся, не отвергающая похвалы грешных устен; радуйся, заступающая людие христолюбивыя.

Радуйся, небесных сил Воеводо; радуйся, Путеводительнице воинств православных.

Радуйся, явлением иконы пречудныя верных возрадовавшая; радуйся, ангельский чин возвеселившая.

Радуйся, Богоблагодатная Марие, святорусския земли хранительнице.

Кондак 1

Избраннице Бога Вышняго, Заступнице Усердной рода христианскаго, державным омофором благодати Господней, аки ангельскима крилома, покрывающей страну нашу Российскую ради веры ея православныя, благодарственно воспоем, радующеся о явлении иконы Твоея Казанския в веси Жадовстей, и помощи Ея просяще, воззовем:

Радуйся, Богоблагодатная Марие, святорусския земли хранительнице.

Молитва.

Возрадовашеся душа моя о Тебе, Царице Матери; о Тебе же торжествует Херувимских чинов естество; Тебе немолчными гласы воспевает сонм святых и праведных; Тебе поем и мы земные и перстные. Тебя хвалим и мы грешные, Тебя благословим, Тебя благодарим, Раю словесный, и Тебе покланяемся, Освященный Храме. Покаянием слезным взыскуя, милосердием Твоим дарованное нам благодатное умиление и Творца всех благоволение благодарно приемлем, яко залог спасения, яко милости Твоя к нам пребогатыя.

О, Величественная и Преблагословенная Жено, Владычице Небесная, Дево Неискусобрачная, Цвете Неувядаемый и Утробо Боговоплощения, призри на грешныя рабы Твоя, не остави нас во всякой скорби и обстоянии, но взыскуй нас погибающих от страстей и тли смертной, являя милосердие Матернее, умилостивляя Владыку вселенней. Честнейшая и Чистейшая Херувимов, Светлейшая Серафимов, Небесных сил Превысшая, любоблагоутробная Мати, Иисуса Христа нам Рождшая и тем же нас научающая поклонятися Отцу и Сыну и Святому Духу Троице во Едином Существе, всегда, ныне и присно и во веки веков. Аминь.