Святцы: Соообщество Православных Прихожан


Акафист святителю Феодору, архиепископу Ростовскому, чудотворцу (Акафисты русским святым)

Память: 11 декабря (28 ноября ст. ст.)

Утвержден для общецерковного использования.

Кондакъ 1.

Возбранный чудотворче, многоцѣлебный чудесъ источниче, неисчерпаемыя благодати источаяй, угодниче Христовъ, великій святителю Ѳеодоре, яко веліе имѣяй дерзновеніе ко Христу Господу, отъ всякихъ мя бѣдъ свободи зовуща:

Радуйся, новый чудотворче Ѳеодоре.

Икосъ 1.

Ангела образомъ, человѣка суща естествомъ, именуемъ тя быти, преблажение святителю Ѳеодоре: аще и тлѣнную на земли плоть носилъ еси, но нетлѣніемъ одѣянъ явился еси, тѣмже вопіюще ти, радуйся, приносимъ:

Радуйся, Церкве Христовы теплый защитителю; радуйся, избранный Духа Святаго сосуде; радуйся, ангеловъ собесѣдниче; радуйся, апостоловъ истинный преемниче; радуйся, святителей сопрестольниче; радуйся, мучениковъ похвало; радуйся, постниковъ преславное удобреніе; радуйся, преподобныхъ вѣнче; радуйся, пастырю добрый; радуйся, воине Христовъ непобѣдимый; радуйся, звѣздо пресвѣтлая, въ Ростовѣ возсіявшая.

Радуйся, новый чудотворче Ѳеодоре.

Кондакъ 2.

Видя въ прелестномъ мíрѣ семъ непостоянства и неустройства, презрѣвъ вся прелести, воспріялъ еси иноческое житіе, идѣже болѣзньми постническими просвѣтивъ душу твою, всеблаженне, яко чисту жертву принеслъ еси, радуяся, всегда воспѣвая Богу: Аллилуія.

Икосъ 2.

Разумъ непреклонный отъ юности твоея стяжалъ еси, святителю Ѳеодоре, егда всю прелесть, вся суеты суетствъ въ мíрѣ семъ проразсудилъ еси, тогда единаго безцѣннаго бисера Христа Господа взыскати возжелалъ еси, тѣмже вопіемъ ти:

Радуйся, яко премудрости Божіей чистое пріятелище былъ еси; радуйся, яко вся прелестная мудрованія ни во что вмѣнилъ еси; радуйся, яко едина небесная благая возлюбилъ еси; радуйся, яко трудами и поты душу твою просвѣтилъ еси; радуйся, яко чисту жертву Христови принеслъ еси; радуйся, яко плоть духу поработилъ еси; радуйся, яко душу равноангельску сотворилъ еси; радуйся, яко широкій путь, ведущій въ пагубу, возненавидѣлъ еси; радуйся, яко тѣсною и прискорбною стезею паче шествовати возлюбилъ еси; радуйся, яко противу кознемъ діавольскимъ стати неустрашился еси; радуйся, яко храмъ Духа Святаго былъ еси.

Радуйся, новый чудотворче Ѳеодоре.

Кондакъ 3.

Силою свыше, благодатію Духа Святаго облеченъ былъ еси, и силы безсильнаго низложилъ еси; подаждь и намъ, во всѣхъ благихъ изнемогающимъ, молитвами твоими руку помощи, богоблаженне, и сподоби съ тобою воспѣвати Богу: Аллилуія.

Икосъ 3.

Имѣя въ сердцѣ твоемъ неоскудное благоразсужденія богатство, како безбѣдно преплыть волнующуюся мíра сего пучину, обаче никакоже устрашился еси шумящихъ волнъ прираженіе, въ малой плоти твоея ладіи многомятежное сіе море безбѣдно преплылъ еси; мы же, недостойніи, удивляющеся таковому твоему великодушію, сице вопіемъ ти:

Радуйся, яко ладію, плоть твою добродѣтельми умастилъ еси; радуйся, яко волнующееся мíра сего море безбѣдно преплылъ еси; радуйся, яко корабль души твоея ко благоутишному пристанищу управилъ еси; радуйся, пресвѣтлая звѣздо, въ морѣ плавающимъ путь показующая; радуйся, всѣмъ волнующимся пристанище тихое; радуйся, всѣмъ отъ пути спасительнаго блудящимъ кормчій недремлющій; радуйся, добрыхъ защитниче; радуйся, согрѣшающихъ наставниче; радуйся, воине Христовъ неустрашимый; радуйся, побѣдителю страстей непреоборимый; радуйся, евангельскаго благородія вѣтвь прекрасная.

Радуйся, новый чудотворче Ѳеодоре.

Кондакъ 4.

Буря нестерпимыхъ моихъ скорбей и болѣзней смущаетъ и рѣетъ мя въ глубину отчаянія, но, о преблаженне Ѳеодоре! ускори на молитву и потщися на умоленіе, укроти и утоли скорбей моихъ бурю, да здравымъ сердцемъ и несмущеннымъ умомъ воспою пѣснь Богу: Аллилуія.

Икосъ 4.

Слышаша окрестные народи о преславныхъ чудесѣхъ твоихъ, яко твоими молитвами всякія недуги исцѣляются и вся лютѣйшія страсти укрощаются; исцѣли убо и мене окаяннаго, бѣднѣ страждуща и со многими рыданьми тебѣ таковая вопіюща:

Радуйся, всѣхъ обуреваемыхъ тихое пристанище; радуйся, печальныхъ утѣшеніе; радуйся, всѣхъ скорбящихъ радосте; радуйся, всѣхъ изнемогающихъ скорое возставленіе; радуйся, милосердія сокровище неистощимое; радуйся, пресвѣтлое Православія свѣтило, всю Россíю просвѣщающее; радуйся, заре свѣтозарная, на востоцѣ возсіявшая; радуйся, озареніе трисолнечнаго свѣта; радуйся, деннице незаходимаго Солнца; радуйся, свѣще, божественнымъ пламенемъ вожженная; радуйся, вѣрный цѣломудрія ключарю.

Радуйся, новый чудотворче Ѳеодоре.

Кондакъ 5.

Благаго Бога вѣрный рабе, святителю Ѳеодоре, винограда Его прилѣжный дѣлателю, добрѣ стадо упаслъ еси, евангельскими словесы людей твоихъ сердца напоилъ еси, и сѣмя благочестія въ нихъ возрастилъ еси, и нынѣ, предстоя Христу, непрестанно воспѣваеши: Аллилуія.

Икосъ 5.

Воздержаніемъ и бдѣніемъ тѣло духу поработилъ еси, душу же равноангельску сотворилъ еси; поминай, преблаженне, вѣрою чтущія тя и сице вопіющія тебѣ:

Радуйся, благочестія столпе; радуйся, вѣрныхъ прибѣжища граде; радуйся, твердое Православія укрѣпленіе; радуйся, святое очистилище нравовъ; радуйся, добродѣтелей великое вмѣстилище; радуйся, святыни чистое и честное жилище; радуйся, свѣтильниче пресвѣтлый; радуйся, свѣте златозарный; радуйся, достойный ангеловъ собесѣдниче; радуйся, добрый человѣкомъ наставниче; радуйся, правило вѣры благочестивыя.

Радуйся, новый чудотворче Ѳеодоре.

Кондакъ 6.

По Господѣ Бозѣ Вседержителѣ ревнуя, поревновалъ еси всеблаженне, всѣмъ уподобляяся сроднику твоему, преподобному отцу Сергію Радонежскому. Онъ убо обитель Пресвятыя Троицы на Радонежѣ возстави и, братію собравъ, начальникъ бысть: ты же въ пресловутомъ градѣ Москвѣ обитель Симонову воздвиже, и наставникъ монаховъ былъ еси. Сего ради нынѣ въ небесныхъ обителехъ купно съ нимъ воспѣваеши: Аллилуія.

Икосъ 6.

Весь и всѣмъ всякъ помощникъ явился еси, присноблаженне Ѳеодоре, яко данною тебѣ отъ Бога благодатію слѣпыя просвѣщаеши, хромыя исправляеши, бѣсы прогоняеши, и всѣмъ вся просимая подаеши, независтно получивше убо таковая, благодарственно приносимъ ти, вопіюще сице:

Радуйся, слѣпыхъ просвѣтителю; радуйся, хромыхъ исправителю; радуйся, бѣсовъ изгонителю; радуйся, врачу скорый съ вѣрою призывающимъ; радуйся, всѣмъ скорбящимъ пріятное попеченіе; радуйся, трисолнечнаго Свѣта пресвѣтлый луче; радуйся, евангельскаго свѣта изъяснителю; радуйся, свѣтильниче, на высокомъ добродѣтелей свѣщницѣ поставленный; радуйся, небесный человѣче; радуйся, земный ангеле; радуйся, яко возшелъ еси въ радость Господа твоего.

Радуйся, новый чудотворче Ѳеодоре.

Кондакъ 7.

Хотя Господь въ Россíи предъ человѣки прославити тя, богомудре Ѳеодоре, по долговременномъ въ земли пребываніи цѣлы и нетлѣнны соблюде мощи твоя, имиже изліялъ благодать Духа Святаго: всякія недуги и болѣзни въ человѣцѣхъ исцѣляти и бѣсы прогоняти; сего ради благодарственно Богу воспѣваемъ: Аллилуія.

Икосъ 7.

Насладився воздержанія, богомудре Ѳеодоре, и желаніе плоти твоея обуздавъ, на престолѣ святительства сѣлъ еси, и яко звѣзда пресвѣтлая, просвѣщаеши вѣрныхъ сердца зарями чудесъ твоихъ, отче нашъ, святителю Ѳеодоре. Сего ради мы вопіемъ ти:

Радуйся, падшихъ возстановленіе; радуйся, согрѣшающихъ исправленіе; радуйся, чистоты селеніе; радуйся, единосущныя Троицы пріятелище избранное; радуйся, превеликое сокровище медоточныхъ ученій; радуйся, благовоніе Духа Святаго; радуйся, божественное селеніе; радуйся, рѣко боготочная; радуйся, пресвѣтлое благодати сіяніе; радуйся, смиренія Христова истинный подражателю; радуйся, врачу душъ и тѣлесъ нашихъ.

Радуйся, новый чудотворче Ѳеодоре.

Кондакъ 8.

Странное и необычное содѣяся на тебѣ, преблаженный Ѳеодоре: яко по честнѣмъ твоемъ преставленіи многа лѣта въ земли сокровены быша честныя мощи твоя, нынѣ же цѣлы и невредимы обрѣтошася, яко свѣтозарное солнце вѣрныхъ сердца просвѣщающія, тѣмъ же радостно вопіемъ Богу: Аллилуія.

Икосъ 8.

Вся законы духовныя соблюлъ еси, архипастырь бывъ въ пресловутомъ градѣ Ростовѣ, словесныя овцы твоя благочестію научивъ, и тѣло твое въ немъ яко даръ освященный положилъ еси, которое многими лѣты въ земли сокровенно, нынѣ же обрѣтеся цѣло и нетлѣнно, къ нему же приходящіи и лобызающіи освящаются, съ вѣрою и любовію вопіюще и глаголюще:

Радуйся, свѣще пресвѣтлая; радуйся, всероссíйскій свѣтильниче; радуйся, заре прекрасная; радуйся, звѣздо незаходимая; радуйся цѣломудрія столпе, имже всякая страсть попрася; радуйся, смиреніемъ высокій, имже демоновъ гордыню низложилъ еси; радуйся, свѣтильниче многосвѣтлый; радуйся, сиротъ заступниче; радуйся, нищихъ питателю; радуйся, чудодѣлателю о Бозѣ данныхъ чудесъ; радуйся, Россíйская похвало.

Радуйся, новый чудотворче Ѳеодоре.

Кондакъ 9.

Всякое естество ангельское и человѣческое удивися твоему благонравію, яко мíра сего вся прелести и красоты отнюдь возненавидѣлъ еси, плотскíя желанія постомъ, жаждою и воздержаніемъ умертвилъ еси, непрестанно воспѣвая Богу ангельскую пѣснь: Аллилуія.

Икосъ 9.

Витíя многовѣщанная, яко рыба безгласная, недоумѣваетъ, что о тебѣ глаголати, паче же страхомъ и радостію объяти бываютъ, яко по многовременномъ въ земли пребываніи честныя твоя мощи, святителю Ѳеодоре, цѣлы и не разрушимы обрѣтошася; сего ради мы, благодаряще таковая Даровавшему намъ, похвальная восписуемъ ти:

Радуйся, апостольскихъ преданій вѣрный хранителю; радуйся, яко земнаго отечества любовь ни во что вмѣнилъ еси; радуйся, яко едину небеснаго отечества красоту искренно возлюбилъ еси; радуйся, крестъ твой со многою радостію терпѣливодушно понеслъ еси; радуйся, избранный сосуде Духа Святаго; радуйся, яко вся страсти воздержаніемъ умертвилъ еси; радуйся, яко умъ твой безстрастіемъ просвѣтилъ еси; радуйся, Россíйскія Церкве свѣтило пресвѣтлое; радуйся, дѣлателю винограда Христова; радуйся, смиренномудрія наставниче; радуйся, кротости пучино.

Радуйся, новый чудотворче Ѳеодоре.

Кондакъ 10.

Спасти Господь хотя страну Россíйскую въ послѣдняя лѣта наша, яви намъ тебе, молитвенника и заступника непостыдна, преблаженне Ѳеодоре, да всеконечное о спасеніи нашемъ утвердимъ тобою упованіе, получивше убо таковаго предстателя, Даровавшему тя благодарственную пѣснь вопіемъ: Аллилуія.

Икосъ 10.

Свѣща дѣлъ моихъ темна есть и ужасаюся съ нею приближитися ко святымъ мощамъ твоимъ: но ты, святителю Ѳеодоре, молитвами твоими на путь правый направи мя, и страстей моихъ многовидныхъ бурю утиши, да достойне принесу ти сицевую пѣснь: радуйся, россіаномъ похвала и прибѣжище непостыдное; радуйся, Крестоносному Императору нашему въ побѣдахъ упованіе твердое; радуйся, яко твоими молитвами противніи побѣждаются; радуйся, яко тобою скипетръ Православія утверждается; радуйся, яко всѣмъ просящимъ подаеши даръ отъ Господа тебѣ дарованный исцѣленія; радуйся, добродѣтелей пресвѣтлое украшеніе; радуйся, благоутробія великое сокровище; радуйся, избранный сосуде Духа Святаго; радуйся, покрове всѣмъ обуреваемымъ; радуйся, премудрости Божія пріятелище бывый; радуйся, яко всѣхъ звати тебѣ подвизаемь.

Радуйся, новый чудотворче Ѳеодоре.

Кондакъ 11.

Пѣньми и пѣсньми почтимъ Христова святителя Ѳеодора, яко умертвивша вся прилоги страстей воздержаніемъ, и зѣло посрамивши противоборца врага и всю его гордыню, нынѣ же водворяется въ селеніяхъ небесныхъ, о насъ моляся, и со ангельскими воинствы вопіетъ: Аллилуія.

Икосъ 11.

Свѣтопріемна свѣтильника стяжахомъ тя, святителю Ѳеодоре, ибо свѣтозарными твоихъ добродѣтелей лучами омраченная наша сердца просвѣщаеши, отчаянныхъ на путь покаянія обращаеши. Просвѣтившеся убо свѣтомъ твоихъ добродѣтелей, таковая восписуемъ ти благодаренія:

Радуйся, яко отчаянныхъ на путь покаянія направилъ еси; радуйся, омраченная просвѣтивый; радуйся, расточенная собравый; радуйся, вѣры и благочестія столпе непоколебимый; радуйся, лѣствицѣ божественная, на высоту добродѣтелей возводящая; радуйся, нескверное добродѣтелей зерцало; радуйся, постниковъ неизмѣнный образе; радуйся, солнце запада непричастное; радуйся, всѣмъ болящимъ скорое врачеваніе; радуйся, въ бѣдахъ сущимъ великій утѣшителю; радуйся, вдовамъ и сиротамъ теплый заступниче.

Радуйся, новый чудотворче Ѳеодоре.

Кондакъ 12.

Благодать свыше пріемый цѣлити всякъ недугъ и всяку болѣзнь, цѣлебниче скорый, исцѣли убо, припадая молю тя, и моя недуги тѣлесныя, вкупѣ и душевныя, да здравымъ моимъ сердцемъ и несмущеннымъ умомъ воспою пѣснь Богу: Аллилуія.

Икосъ 12.

Поюще и восхваляюще твоя чудеса, восхваляемъ тя вси, святителю Ѳеодоре, и вѣруемъ, яко по многотрудной твоей жизни премѣнилъ временная на вѣчная, прешелъ еси отъ скорби на радость, отъ печали на вѣчное веселіе, прешелъ еси отъ земныхъ въ небесная; сего ради мы недостойніи, недостойными устнами еще вопіемъ ти:

Радуйся, яко истинно премѣнилъ еси временная на вѣчная; радуйся, яко прешелъ еси отъ печали на радость; радуйся, яко присно наслаждаяся мыслей неизреченныхъ; радуйся, яко своимъ житіемъ всѣхъ небесныхъ и земныхъ жителей удивилъ еси; радуйся, яко крестъ твой со многимъ терпѣніемъ носилъ еси; радуйся, яко неуклонно прискорбнымъ путемъ шествовалъ еси; радуйся, непоколебимое правды правило; радуйся, свѣтлая святителей похвало; радуйся, благíй рабе вѣрный, яко отъ Бога ввѣренный тебѣ талантъ возрастилъ еси; радуйся, граду Ростову великое украшеніе; радуйся, всея Россíи радованіе.

Радуйся, новый чудотворче Ѳеодоре.

Кондакъ 13.

О, великій и пречудный отче святителю Ѳеодоре, всѣхъ скорбящихъ утѣшеніе! Пріими малое сіе моленіе наше, и принеси е ко Господу Богу нашему, да избавитъ насъ отъ всѣхъ бѣдъ и напастей, скорбей и болѣзней, и да сподобитъ насъ съ тобою во странѣ живыхъ воспѣти: Аллилуія.

Сей кондакъ глаголи трижды. И паки чтется 1-й икосъ: Ангела образомъ... и кондакъ 1-й: Возбранный чудотворче...