Святцы: Соообщество Православных Прихожан

Акафист святым благоверным князям и мученикам Борису и Глебу во св. Крещении Роману и Давиду, Российским чудотворцам (Акафисты русским святым)

Предназначен для келейного чтения

Память: 15 мая (02 мая ст. ст.); 06 августа (24 июля ст. ст.)

Не утвержден для общецерковного использования.

Акаѳистъ святымъ благовѣрнымъ княземъ и мученикомъ Борису и Глѣбу, во святѣмъ крещеніи Роману и Давиду, Россíйскимъ чудотворцемъ

Кондакъ 1

Избранніи чудотворцы и доблественіи воини Христовы, благаго корене блазíи отрасли, пресвѣтлая двоице, въ недузѣхъ безмездніи врачеве и ко Спасу о всемъ мíрѣ тепліи молитвенницы, восхваляемъ васъ любовію, святíи и благовѣрніи князи, Борисе и Глѣбе. Вы же, яко имущіи дерзновеніе ко Пресвятѣй Троицѣ, отъ всякихъ насъ бѣдъ избавите, да зовемъ къ вамъ:

Радуйтеся, Борисе и Глѣбе, велицыи Россíйстіи чудотворцы.

Икосъ 1

Ангеловъ Господнихъ сограждане явистеся святíи благовѣрніи Борисе и Глѣбе, не оставляюще согражданъ земнаго мíра: по страданіи бо вашемъ честная тѣлеса ваша, мученическою кровію обагренная, и благодатію Божіею прославленная, всѣмъ, съ вѣрою къ нимъ притекающимъ и прикасающимся, источаютъ многоразличная чудесная исцѣленія; души же ваша предстоятъ съ лики ангельскими и со всѣми святыми Пресвятѣй Троицѣ. Тѣмже мы, россíйстіи сынове, удивляющеся вашему горнему и дольнему гражданству, благоговѣйно преклоняюще предъ вами колѣна тѣлесная и сердца наша, умильно вопіемъ сице:

Радуйтеся, яко вышнимъ Богомъ изъ тмы идолослуженія въ чудный свѣтъ истиннаго богопознанія приведени есте. Радуйтеся, яко чада, паче всѣхъ возлюбленная благовѣрному отцу вашему. Радуйтеся, истинніи Евангелія Христова послѣдователи. Радуйтеся, Божественныхъ писаній добріи ученицы. Радуйтеся, одежды крещенія непорочніи хранители. Радуйтеся, христіанскаго благочестія присніи ревнители. Радуйтеся, яко неустрашимо страданія мученическая пріяли есте. Радуйтеся, Христовымъ страстемъ подражатели. Радуйтеся, благоугодившіи Богови словомъ и житіемъ. Радуйтеся, всельшіися во обители Отца Небеснаго. Радуйтеся, мзду трудовъ и терпѣнія вашего воспріявшіи отъ Господа. Радуйтеся, облеченніи виссономъ чистоты и непорочности. Радуйтеся, молитвами вашими ко Господу многимъ заступничество явили есте.

Радуйтеся, Борисе и Глѣбе, велицыи Россíйстіи чудотворцы.

Кондакъ 2

Видѣвше сынове Россíйстіи святый храмъ, исполненный благоуханія пречуднаго, внегда отверзоша раку и обоняша оное, вси прославиша Бога, тѣмже и мы, грѣшніи и недостойніи, благоговѣюще предъ пречудною святынею, прославляемъ Дивнаго во святыхъ Своихъ Бога, непрестанно вопіюще: Аллилуія.

Икосъ 2

Разумъ здравый стяжавшіи святымъ и богоугоднымъ вашимъ житіемъ, страстотерпцы Христовы Борисе и Глѣбе. Егда услышасте лишеніе вашего временнаго живота отъ лютаго и властолюбиваго брата вашего Святополка, нимало не помысливше противу его ратною бранію идти, лучше возжеласте жизни своея лишитися, нежели съ братомъ имѣти брань и христіанскую кровь проливати. Сего ради мы, предстояще молитвенно предъ вами, возводимъ очеса наша сердечная къ вамъ горѣ, на небеси живущимъ, почитающе честная ваша страданія сими похвальными пѣсньми:

Радуйтеся, Живаго Бога паче всего мíра возлюбившіи. Радуйтеся, суетныхъ помышленій презрители. Радуйтеся, вѣнценосцы нарочитіи. Радуйтеся, заповѣдей Христовыхъ исполнители. Радуйтеся, оправданій Господнихъ пресвѣтлыя свѣщи. Радуйтеся, пресладкіи слышатели Божественныхъ словесъ. Радуйтеся, искусніи хранители церковныхъ правилъ. Радуйтеся, тмы грѣховныя попратели. Радуйтеся, небесныхъ благъ причастницы. Радуйтеся, никакоже къ земнымъ благомъ сердце свое прилѣпившіи. Радуйтеся, тепліи молитвенницы ко Спасу о душахъ нашихъ.

Радуйтеся, Борисе и Глѣбе, велицыи Россíйстіи чудотворцы.

Кондакъ 3

Силою Божественною подвизаеми, на умоленіе соотчичей вашихъ явльшеся, имъ есте покровители, защитницы и помощницы; страны бо ихъ отъ нападеній вражіихъ избавляете, страждущихъ отъ всякихъ недуговъ и болѣзней исцѣляете и во вcякомъ благомъ преспѣяніи помогаете всѣмъ, вопіющимъ Богу: Аллилуія.

Икосъ 3

Имуще воистинну воини Христовы, Борисе и Глѣбе, пламенное и нехладное сердце ко благохваленію Дивнаго въ чудесѣхъ Бога, молитеся непрестанно о спасеніи душъ къ вамъ усердно прибѣгающихъ. Сего ради мы отъ глубины сердецъ нашихъ умиленно приносимъ къ вамъ таковая пѣнія:

Радуйтеся, Господу славы выну предстоятели. Радуйтеся, ангельскія трисвятыя пѣсни слышатели. Радуйтеся, невечерняго дне зрители. Радуйтеся, Царства Христова наслѣдницы. Радуйтеся, нерукотворнаго храма обитатели. Радуйтеся, горнаго Іерусалима именитіи граждане. Радуйтеся, райскихъ селеній созерцатели. Радуйтеся, храмовъ Господнихъ и домовъ благочестивыхъ посѣщатели. Радуйтеся, великихъ праздниковъ и святыхъ угодниковъ почитанія наставницы. Радуйтеся, не радящихъ о благочестіи наказатели. Радуйтеся, въ добродѣтелехъ преспѣвающихъ споспѣшницы.

Радуйтеся, Борисе и Глѣбе, велицыи Россíйстіи чудотворцы.

Кондакъ 4

Бурею невѣрія одержимыхъ, ходящихъ во тмѣ злочестія и не брегущихъ о христіанскомъ благочестіи, огнемъ наказанія опаляете, да тѣмъ уцѣломудрившіися истинно познаютъ истиннаго Бога, благочестно Его чтуще и со страхомъ Ему вопіюще: Аллилуія.

Икосъ 4

Слышаще ваша, страстотерпцы святíи Борисе и Глѣбе, чудеса, россíйстіи сынове не токмо изъ ближнихъ, но и изъ дальнихъ странъ Россíйскихъ стекаются къ вашимъ чудодѣйствующимъ мощемъ, и, исцѣляющеся отъ недуговъ и болѣзней, вопіютъ къ вамъ таковая:

Радуйтеся, первіи въ Россíи угодницы Христовы. Радуйтеся, велицыи въ напастехъ утѣшители. Радуйтеся, въ убожествѣ и нуждахъ благочестивымъ пособницы. Радуйтеся, вѣры Христовой ревнители. Радуйтеся, ересей искоренители. Радуйтеся, расколовъ презрители. Радуйтеся, Божественныя службы пламенныя любители. Радуйтеся, винограда Христова многолиственная древеса, имиже покрываются мнози. Радуйтеся, божественныя лозы пресладкое рождіе. Радуйтеся, благочестія добріи строители. Радуйтеся, истинніи и безмездніи врачеве. Радуйтеся, о спасеніи рода христіанскаго ходатаи.

Радуйтеся, Борисе и Глѣбе, велицыи Россíйстіи чудотворцы.

Кондакъ 5

Боготечныя звѣзды явистеся намъ въ земной юдоли сей: внегда бо обуреватися намъ волнами житейскихъ попеченій и направляти путь житейскаго шествія своего къ тихому пристанищу, вашими молитвами избавляеми есмы отъ блужденія и потопленія, сего ради, славяще Господа, вопіемъ: Аллилуія.

Икосъ 5

Видѣвше сынове россíйстіи, яко притекающіи къ вамъ съ вѣрою, пріемлютъ ходатайствомъ и заступничествомъ вашимъ въ нуждахъ скорое утѣшеніе и избавленіе отъ золъ, восхваляютъ васъ сице:

Радуйтеся, Россíйскихъ странъ недремлющіи стражи. Радуйтеся, идольскаго нечестія обличители. Радуйтеся, гордыни и буесловія посрамители. Радуйтеся, мудрымъ къ вѣрѣ и благочестію правители. Радуйтеся, добріи воини Христовы. Радуйтеся, враждующихъ на землю отцевъ вашихъ укротители. Радуйтеся, злобы и мщенія угасители. Радуйтеся, полчищъ вражескихъ расточители. Радуйтеся, яко прославившіи Бога въ душахъ и тѣлесѣхъ вашихъ. Радуйтеся, яко прославлени есте на земли чудодѣйствіемъ. Радуйтеся, яко благородство земное носивше, сподобистеся царствовати въ Царствіи небеснѣмъ. Радуйтеся, во Отечествіи своемъ мира, тишины и спокойствія возстановители.

Радуйтеся, Борисе и Глѣбе, велицыи Россíйстіи чудотворцы.

Кондакъ 6

Проповѣдующи, проповѣдуетъ вся Россíйская держава ваше небесное предстательство у Всевышняго: вы бо яко крѣпцыи щити и яко твердыя стѣны, ограждаете Отечество ваше яко непобѣдимымъ оружіемъ, Божественною благодатію, дарованною вамъ свыше, сего ради, хваляще Бога, поемъ: Аллилуія.

Икосъ 6

Возсіяли есте, яко пресвѣтлыя звѣзды отъ тмы идолослуженія просвѣщеніемъ святаго крещенія, вѣру бо Православную пріявше, обычаи идоложертвенныя искоренили есте, сѣмена благочестія христіанскаго въ сердцахъ подданныхъ своихъ посѣявшіи, на славословіе имене Божія храмы божественныя благолѣпно соорудисте. Сего ради, Борисе и Глѣбе, васъ почитаемъ сими похвальными пѣснми:

Радуйтеся, изъ тмы идолослуженія въ чудный свѣтъ истиннаго богопознанія преселницы. Радуйтеся, идолочестія обличители. Радуйтеся, древняго змíя попратели. Радуйтеся, истинніи образцы кротости и незлобія. Радуйтеся, подвигоположнику Христу послѣдователи. Радуйтеся, житія непорочнаго рачители. Радуйтеся, евангельскихъ проповѣданій блюстители. Радуйтеся, нерастлѣнніи храми Бога Живаго. Радуйтеся, отъ даровъ живущей въ васъ благодати подающіи силу многимъ. Радуйтеся, добродѣтелей чистая зерцала. Радуйтеся, тернія пороковъ ревностніи искоренители. Радуйтеся, велицыи угодницы Христовы.

Радуйтеся, Борисе и Глѣбе, велицыи Россíйстіи чудотворцы.

Кондакъ 7

Аще и многажды злоумышленніи языцы покушахуся внити во внутрь вашего Отечествія и одолѣти его, обаче невидимымъ вашимъ предстательствомъ предъ Богомъ, силою Его постыждени и прогнани быша. Тѣмже удивляющеся неизреченному къ намъ Божію милосердію, поемъ Богу: Аллилуія.

Икосъ 7

Новыя благодати бывшіи причастницы и силою даровъ Святаго Духа исполненніи, не точію въ земли Россíйстѣй явилися есте добріи споспѣшницы вѣры и нравовъ благихъ; но среди чуждихъ народовъ славу имене Господня и силу мышцы Его проявисте. Сего ради похвальными пѣснми васъ ублажаемъ:

Радуйтеся, неувядаеміи цвѣти Россíйскія земли. Радуйтеся, непорочніи агнцы стада Христова. Радуйтеся, яко голубіе, чистотою украшенніи. Радуйтеся, на крилѣхъ вѣры вознесшіися на высоту небесную. Радуйтеся, въ горній Іерусалимъ пресельшіися. Радуйтеся, горняго Сіона наслѣдницы. Радуйтеся, съ лики небесныхъ силъ торжествующіи. Радуйтеся, вертограда небеснаго благолѣпніи гроздіе. Радуйтеся, Христовы Церкве великое удобреніе. Радуйтеся, всѣмъ христіаномъ неизреченныхъ радостей подаватели.

Радуйтеся, Борисе и Глѣбе, велицыи Россíйстіи чудотворцы.

Кондакъ 8

Странная же и ужасная содѣяшася, егда злочестивый варягъ, дерзнувый коснутися стопами своими мѣста свята, на немже почиваху блаженная тѣлеса ваша: огнь бо исшедый изъ земли опали окаяннаго и вѣдати научи силу вашу, угодницы Божіи. Вѣрніи же, прославляюще чудодѣйства ваша, воспѣша Дивному во святыхъ Своихъ Богу: Аллилуія.

Икосъ 8

Весь умъ вперивше въ службу Божественную и духовная псалмопѣнія, явилися есте яко непобѣдиміи Христовы воини, егда нечестивіи человѣцы пріидоша отъ лютаго Святополка убити васъ; обаче не убояшася возложити руки на васъ и неповинную кровь вашу пролити. Мы же, вѣрніи, чествующе вѣру и страданія ваша, взываемъ сице:

Радуйтеся, истиннаго Мессíи Іисуса Христа Сына Божія истинніи исповѣдницы. Радуйтеся, апостольскихъ проповѣданій ревнительнѣйшіи пріемницы. Радуйтеся, святыхъ отцевъ преданій вѣрніи блюстители. Радуйтеся, яко возлюбисте животъ вѣчный паче временнаго. Радуйтеся, яко Царство небесное предпочтосте царству земному. Радуйтеся, въ вѣрѣ Христовой вѣрнымъ извѣстное утвержденіе. Радуйтеся, яко службу Божію при себѣ всегда имѣсте. Радуйтеся, яко божественное чтеніе и пѣніе сладостію послушасте. Радуйтеся, яко и сами Божественная словеса во устѣхъ своихъ держаще, въ сердцы аки неоцѣненное сокровище носисте. Радуйтеся, яко духъ вашъ сокрушенный и сердце ваше смиренное жертва Богу быша. Радуйтеся, яко души и тѣлеса ваша въ страданіи, яко злато въ горнилѣ, искушени. Радуйтеся, яко съ лики мучениковъ сопричтени есте.

Радуйтеся, Борисе и Глѣбе, велицыи Россíйстіи чудотворцы.

Кондакъ 9

Вси вѣрніи, чтущіи благолѣпно память вашу, во святѣмъ храмѣ вашемъ стекшеся и славяще страданія ваша и чудеса, яже содѣясте силою Бога, Спаса нашего, вопіютъ къ Нему: Аллилуія.

Икосъ 9

Вѣтíи невѣрніи еще труждаются помышляти и мудрствовати о святыни вашей, Борисе и Глѣбе, недоумѣваютъ убо изрещи, како тѣлеса ваша на земли не истлѣваются, души же ваша на небесѣхъ въ сонмѣхъ ангеловъ прославляются. Мы же, просвѣщаеми вѣрою, благолѣпно вопіемъ:

Радуйтеся, воини Христовы непобѣдиміи. Радуйтеся, крѣпцыи щити и броня воинства Россíйскаго. Радуйтеся, Царя славы прославленіе. Радуйтеся, князя тмы посрамленіе. Радуйтеся, глаголовъ Божіихъ оправданіе. Радуйтеся, Божественныя премудрости исполненіе. Радуйтеся, чудесъ Христовыхъ проповѣдницы. Радуйтеся, вѣчныя радости наслѣдницы. Радуйтеся, яко жизнь грядущую возлюбили есте. Радуйтеся, яко блага временная презрѣли есте. Радуйтеся, яко власти вѣка сего отринули есте. Радуйтеся, яко красотою добродѣтелей украшени есте.

Радуйтеся, Борисе и Глѣбе, велицыи Россíйстіи чудотворцы.

Кондакъ 10

Спасти хотяще души своя, святíи страстотерпцы, не брегосте о тѣлесѣхъ вашихъ и предасте ихъ на убіеніе, вопіюще къ Богу: Аллилуія.

Икосъ 10

Стѣны есте, ограждающіи благоденствіе Россíи, святíи Борисе и Глѣбе, и неутомиміи стражи противу врагъ нашихъ пребываете, непрестанно молящеся Господу Богу о спасеніи душъ нашихъ и исцѣляюще немощи наша. Сего ради умильно вопіемъ ко святыни вашей:

Радуйтеся, яко сынове россíйстіи ходатайствомъ вашимъ спасаются. Радуйтеся, яко вси правовѣрніи молитвами вашими отъ бѣдъ и скорбей исцѣляются. Радуйтеся, яко врази наши васъ устрашаются. Радуйтеся, яко все Отечествіе наше молитвами вашими спасается. Радуйтеся, яко похвальными вѣнцы Россíйская Церковь васъ вѣнчаетъ. Радуйтеся, яко подвиги ваша вси правовѣрніи немолчно воспѣваютъ. Радуйтеся, яко старцы и юноши къ покрову вашему прибѣгаютъ. Радуйтеся, яко царіе и воини, богатіи и убозіи васъ прославляютъ. Радуйтеся, скоріи помощницы. Радуйтеся, мощніи заступницы. Радуйтеся, мученическую смерть пріявшіи.

Радуйтеся, Борисе и Глѣбе, велицыи Россíйстіи чудотворцы.

Кондакъ 11

Пѣніе всеумиленное не умолче во устѣхъ вашихъ, егда лютіи губителіе устремляхуся на васъ, яко на агнцевъ, готовыхъ на заколеніе. Сія воспоминающе и славяще Господа, давшаго вамъ силу таковую, взываемъ къ Нему: Аллилуія.

Икосъ 11

Свѣтозарныя свѣщи видимъ въ васъ, святíи благовѣрніи князіе Борисе и Глѣбе, освящающіи Россíйскую Церковь и всѣхъ вѣрныхъ чадъ ея, да прославляютъ святую память вашу, вопіюще:

Радуйтеся, Россíйскія Церкве похвало. Радуйтеся, православныя державы и градовъ ея лѣпото. Радуйтеся, во единѣмъ дусѣ благочестія пожившіи предъ Господѣмъ. Радуйтеся, тѣлесемъ вашимъ стяжавшіи безсмертіе. Радуйтеся, яко подвизавшійся подвигомъ добрымъ вѣнчается вѣнцемъ славы невечернія. Радуйтеся, яко теченіе житія мученически скончавшій, водворится во обители Отца Небеснаго. Радуйтеся, всехвальніи мученицы. Радуйтеся, добрѣ подражавшіи яко во единѣмъ тѣлеси суще, искупльшему насъ Владыцѣ.

Радуйтеся, Борисе и Глѣбе, велицыи Россíйстіи чудотворцы.

Кондакъ 12

Благодать, данную вамъ отъ Бога на благо сыновъ Россíи, россíйстіи чудотворцы Борисе и Глѣбе, не втуне оставили есте: явиста бо ся цѣлителіе болящихъ, утѣшителіе сущихъ въ скорбехъ и заключеніи, наставницы заблуждшихъ и скоріи помощницы всѣмъ, съ вѣрою призывающимъ васъ, угодницы Божіи; да вси вкупѣ вопіемъ ко Господу: Аллилуія.

Икосъ 12

Поюще и восхваляюще чудеса ваша, чествующе святую память вашу, преславная Церковь Россíйская, и мы, чада ея, очи сердца возводяще ко Господу, сице вопіемъ:

Радуйтеся, сопротивныхъ враговъ побѣдители. Радуйтеся, недугующихъ врачеве. Радуйтеся, россíйскихъ градовъ и весей пресвѣтлое сіяніе. Радуйтеся, россíйскаго воинства твердое огражденіе. Радуйтеся, яко страданіи вашими снискасте вѣчную радость. Радуйтеся, яко вкусивше мученическую смерть прешли есте къ блаженному безсмертію. Радуйтеся, яко искушенніи въ горнилѣ житейскихъ обуреваній явистася чистѣйшіи злата, принесшіи себе яко всеплодіе Богови. Радуйтеся, корене честнаго благíя отрасли. Радуйтеся, живота вѣчнаго и Царствія Божія наслѣдницы. Радуйтеся, яко сопричастницы есте ангельскому сонму. Радуйтеся, яко Россíйская держава, еяже сынове и заступницы есте, благоговѣйно память вашу чествуетъ.

Радуйтеся, Борисе и Глѣбе, велицыи Россíйстіи чудотворцы.

Кондакъ 13

О, святíи и всеславніи чудотворцы Борисе и Глѣбе, велицыи россíйстіи помощницы въ бѣдахъ и напастехъ! Не презрите насъ, грѣшныхъ, но пріимите моленіе наше, якоже пріяли есте молитвы благовѣрныхъ россíйскихъ князей Александра и Димитрія, и принесите Всемилостивому Спасу наше молебное приношеніе, да избавитъ насъ отъ всякихъ бѣдъ и напастей, да охранитъ Отечествіе наше отъ врагъ видимыхъ и невидимыхъ, и да вопіемъ съ вами ко Господу: Аллилуія.

Сей кондакъ глаголется трижды. Таже Икосъ 1-й и Кондакъ 1-й

Молитва

Святíи страстотерпцы, боголюбивая двоице, благовѣрніи князи Борисе и Глѣбе, измлада всею душею Христа возлюбившіи, цѣломудріе, кротость, смиреніе и прочія добродѣтели стяжали есте и, яко агнцы незлобивіи, отъ брата своего неправедное убіеніе претерпѣли есте, чистыя своя души въ благопріятную жертву Богу принесосте и отъ Него вѣнцы нетлѣнныя пріясте, припадающе къ честному образу вашему, молимъ васъ въ дусѣ сокрушеннѣ и смиреннѣ: вознесите своя усердныя молитвы ко Всемилостивому Спасу нашему, да подастъ намъ, чтущимъ святую память вашу, великія Своя и богатыя милости. Церковь Свою святую да соблюдетъ отъ ересей и расколовъ, въ чадѣхъ ея да оживетъ духъ правыя вѣры и любве, духъ вѣдѣнія и благочестія, да даруетъ всѣмъ намъ вся, яже къ жизни временнѣй и вѣчнѣй потребная. Ей, святíи страстотерпцы, ускорите на помощь къ намъ, якоже сроднику вашему благовѣрному князю Александру Невскому, и избавите страну нашу отъ врагъ видимыхъ и невидимыхъ, отъ глада, огня, смертоносныя язвы, отъ всякихъ бѣдъ и напастей; разгоните облежащій ны мракъ невѣрія и развращенія, да мирно и благочестно поживемъ въ вѣцѣ семъ и сподобимся христіанскія кончины и добраго отвѣта на страшнѣмъ Судѣ Христа Бога, Емуже подобаетъ честь и поклоненіе со Безначальнымъ Его Отцемъ и Пресвятымъ Животворящимъ Духомъ, нынѣ и присно и во вѣки вѣковъ. Аминь.