Святцы: Соообщество Православных Прихожан

Канон священномученику Автоному Италийскому (Каноны святым)

Песнь 1.

Ирмос:

Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.

Законы измлада Творца своспитався, возрасл еси в законе добродетелей и благочестия версте, тем законно, отче, пострадал еси.

Вооружил еси помысл терпения и мужества оружием, мудре, на прелести рать ополчився, невозвратно победив ту.

Законов благочестия наставник и догматов, отче, истины проповедник явлься, во всей твари огласился еси, яко апостоли, Автономе.

Богородичен: Познавше явльшагося на земли Бога воплощенна и обожившеся от Него благодатию, поем Тя, Дево, дарований насладившеся.

Песнь 3.

Ирмос:

Ты еси утверждение притекающих к Тебе, Господи, Ты еси Свет омраченных, и поет Тя дух мой.

Тучами словес твоих безбожия потопил еси страстную тину, иерарше, и верныя напоил еси.

Учитель был еси и служитель Христов, преподобне, и Того Божественных Страстей сообщник и причастник.

Оружием утвердил еси проповедания, преподобне, благопослушливыя, и противящияся безпагубны сохранил еси.

Богородичен: Явися пречудное на небеси и на земли слышание, Творца бо всех сущих, Богородице, неизреченно родила еси.

Седален, глас 4.

Сугуб тебе венец нетления Христос, всеблаженне, дарова, яко страдальцу и честну иерарху, Автономе: Тому бо безкровныя принесл еси жертвы, Того Божественную Страсть нелестно подражая, Того и нестареющияся сладости, блаженне, насладился еси.

Богородичен: Иоаким и Анна торжествуют, по Бозе бо достойно благодать обретоша и родиша плод, богоприятен храм, Деву и Чистую Матерь Божию, едину Благословенную, молящуюся непрестанно спастися душам нашим.

Песнь 4.

Ирмос:

Услышах, Господи, смотрения Твоего таинство, разумех дела Твоя и прославих Твое Божество.

Споспешающа имея Поборника в божественней рати Господа, врага стараго земных победил еси, отче, подвиги твоими.

Видением преклонься, отче, во глубины сокровений Божиих, оттуду тайны навыкл еси Того неизреченныя.

Возглашением словес твоих требища идольская падаху, мудре, и попалишася чтилища прелести огнем велений твоих.

Пламень учений твоих на высокое взятся житие, мудре, тебе концем являя наставника к Богу непрелестна.

Богородичен: Оскверншияся страстьми, омый Богородице, молитвами Твоими и сподоби ны чистыми помышлении пети Твое рождество.

Песнь 5.

Ирмос:

Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.

Свет тя умный озари, Автономе, и жизни слово имущаго светильника всем концем яви тя.

Глагол Божий, яко мечь, извлек, ополчение ссекл еси лжеименныя мудрости, отче Автономе.

Весь вражий тул стрел истощил еси и всуе сих показал еси, вооружившихся на тя, блаженне Автономе.

Богородичен: Быша новая и преславная, Всечестная, Тобою бо на земли Бог плотию явися, и земнии обожихомся.

Песнь 6.

Ирмос:

Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.

Сила тя, мудре, Утешителева укрепи, якоже прежде ученики, и языком вооружи огненным, Автономе, земныя просвещати, огнепопаляти же нечестие.

Младенствующу душевным ти мудрованием, отче преподобне, подвиги паче естества за проповедание и труд неослабный благомощно приял еси немощию естества телесе.

Положил еси под ноги благочестивых главу вражию, на Создателя вознесенную, верою словес вооружив на ню сия благодатию.

Богородичен: Исцелити Тобою естества сокрушения Создатель и Творец восхотев, Богородице, подаде Тя врачевство Божественное в немощех прибегающим Тебе.

Кондак, глас 2.

Божественная, премудре, непорочне тайноводил еси, жертва приятная был еси, богоблаженне: Христову бо пил еси чашу, преславне, светильниче всемирный, моля непрестанно о всех нас.

Песнь 7.

Ирмос:

От Иудеи дошедше, отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

Сочленив во едино благочестия ликования, отче Автономе, верою просвещенныя словесы твоими непрестанно взывати учил еси: отцев наших Боже, благословен еси.

Неослабным мужеством стрясл еси, мучениче, безбожных веления, в душах утвержденная неверных, и от оснований сия мудре исторгл еси, в сердцах верных благодать утверждая.

Твоего священства смешено помазание, отче Автономе, страдание божественно, кровь бо тя светла иерарха показа вопиющим верно: Христе, благословен еси.

Богородичен: Иже от земли создав человеческое естество, яко Творец и Бог, истлевшее поновляет, от Тебе, Богомати, сие прием, и таинственнаго сподобляет, Чистая, Сынотворения.

Песнь 8.

Ирмос:

Царя Небеснаго, Егоже поют вои ангельстии, хвалите и превозносите во вся веки.

Укрепляющуся тебе во Христе, мучителей крепость падаше, богомудре: страшен бо ей духом был еси.

Доблестию разума прелести гнилое обличил еси, всеблаженне, крепость в делех явив благочестия.

Чудес твоих реки излиявшеся, исцелений бездну тя, отче, явиша в мире, источающую благодать.

Богородичен: Препрославися истинно в знамениих на земли благодать Твоя, Дево: странно бо чудо Твоего рождения.

Песнь 9.

Ирмос:

Воистинну Богородицу, Тя исповедуем, спасеннии Тобою, Дево Чистая, с безплотными лики Тя величающе.

Летая на высоту благочестия, добродетельми возношаемь, Автономе, и Христу страданием, отче, востекл еси.

Болезни твоя со слезами сеявшеся, богомудре, неотъемлемыя плоды расплодиша радости и славы, сладости, яже во Христе Иисусе.

Законно венцев и Божественных дарований сподобився, иерарше Автономе, законы Божественными утверждаеши ны молитвами твоими.

Богородичен: Жизнь и Нетление родила еси, Дево, победители смерти сотворшаго Богородицу воистинну Тя величающия.