Русская Православная Церковь. Святцы

Канон святителю Проклу Константинопольскому (Каноны святым)

Песнь 1.

Ирмос:

Твоя победительная десница боголепно в крепости прославися: та бо, Безсмертне, яко всемогущая противныя сотре, израильтяном путь глубины новосоделавшая.

Деянием же и словом истинным разумных архангелов быв сообразен, богоприятне, и с ними престолу предстоя честныя Троицы, Юже, Прокле, моли спасти нас.

Стопам последуя яве Златоустаго, всеблаженне и приснопамятне, тогоже божественное священства, отче, одеяние яко наследие взял еси отеческое, достославне.

Древле Бога на землю Исаии вопиющу Духом приити, Несторий, умовредно оболгуяй воплощение, от тебе, треблаженне, соборне низвергается.

Богородичен: Словесы богодохновенными страшное от Девы уяснил еси воплощение Слова Бога нашего и Богородицу Сию проповедав, догматом всемудрым апостолов последуя.

Песнь 3.

Ирмос:

Едине, ведый человеческаго существа немощь и милостивно в не воображся, препояши мя с высоты силою, еже вопити Тебе, Святый, одушевленный храме неизреченныя славы Твоея, Человеколюбче.

Свет из Света боговидно, всеблаженне, прием, Церкве свет был еси. Темже и Свет тебе Божественный возсия разумно, якоже есть писано, имже просвещаемь, поющия озаряеши память твою.

Вострубив догматов громом, яко стены низложил еси Иерихонския ересей дерзости вся, и воинства, и одоления победу возставил еси, воплощение Божие еже от Девы проповедав ясно.

Источнику мудрости приложив уста твоя, богоприятне, и духовныя почерпл еси мудрости, Прокле, божественныя воды, мутныя потопив реки, всеблаженне, Несториева безбожная мнения.

Богородичен: Иже горе Отцу Единородный Сын неизреченно сразумеваемь, единородный из Тебе доле, Пречистая, паче вины и разума родися и обожает человека, Пречистая Владычице Богородице: темже Тя славим.

Кондак, глас 4.

Достойно днесь торжествует всех градов честнейший воистинну в честном преставлении твоем, отче отцев, Прокле мудре.

Седален, глас 3.

Божественный быв священнопроповедник, божественным учением Церковь обогащая, тайноучителю всехвальне, и Богородицу Деву Пречистую проповедал еси и Нестория посрамил еси. Темже вси чтим верно память твою, просяще прияти велию милость.

Слава, и ныне: Восхвалите, девы, матери, предпразднуйте, людие, славословите, священницы, благословите Пречистую Матерь Божию: плотию бо младенствующи прежде, во храм принесеся, яко храм Божий святейший. Темже праздник совершающе духовный, воспоем Ю, яко Предстательницу рода человеческаго.

Песнь 4.

Ирмос:

Гору Тя, благодатию Божиею приосененную, прозорливыма Аввакум усмотрив очима, из Тебе изыти Израилеву провозглашаше Святому, во спасение наше и обновление.

Глагол вещания и догматов благогласный учений твоих гром Церковь Божию мудро веселят, еретическое отгонят свирепство, священноявленне Прокле всеславне.

Якоже злато огнем, священнейше, воздержанием честное тело твое очистив, мудре, красно показал еси Творцу. Сего ради тебе одеяние священства вечно дарова.

Знание божественное навык, быв яко иерарх священный, благоподатно прочее всем преподал еси просвещение и божественныя светлости во спасение душ, достославне.

Богородичен: Угль Божественный во утробе, Всенепорочная, приемши паче ума, не опалилася еси истинно: купина бо издалеча образно Твое Рождество прообразова во спасение наше и обновление.

Песнь 5.

Ирмос:

Просветивый сиянием пришествия Твоего, Христе, и осветивый Крестом Твоим мира концы, сердца просвети светом Твоего богоразумия, православно поющих Тя.

Светоносен, яко светильник, всеблаженне, быв, божественныя Церкве явился еси поборник, и Божия уяснил еси еже из Девы Всесвятыя Рождество невращное, славне.

Воплощение Божие из Девы славное догматов в пращу вложив, яко иноплеменника Голиафа, низложил еси Несториев свирепый нрав, яко древле божественный Давид.

Павловыми учении сый исполнен и того видения узрев, всеизбранне, Елиссей вторый показався, мастию божественною, священством, помазан таинственно.

Богородичен: Ни смущения, ни смешения во утробе прият Девы Бог, плотию происходя, но еже бе, пребысть, Бог и Человек, невращно действы являемь.

Песнь 6.

Ирмос:

Обыде нас последняя бездна, несть избавляяй, вменихомся, яко овцы заколения, спаси люди Твоя, Боже наш, Ты бо крепость немощствующих и исправление.

Обышедшия, яко звери, отгнал еси ересей от стада Христова поборники жезлом разумным твоих учений, Прокле блаженне, к пастве же православия паству исправил еси.

Яко ин ковчег, Церкви Христове тело всеблаженнаго Златоуста вдал еси твоими, Прокле, поученьми и возвеселил еси православных лики присутствием его.

На великое возшед седалище, преподобне, величайшими исправлении украсил еси тое боголепно. Темже, сошедшеся, благохвалим тя, архиерее, великомудренне Прокле славне.

Богородичен: Явилася еси херувимов, Богоблагодатная Дево, преимущи: на рамех бо носима теми, Чистая, объятии Твоими носила еси. Темже Тя присно, Богородице, вси славим.

Кондак, глас 8.

Всечестнаго святителя, Царскаго града престол украсившаго и сокровищем безценным того обогащшаго, пречистыми мощами Златоустовыми, имже слово животно стяжа, просвещая верно чтущия его, песньми похваления того радостно ублажим, зовуще: радуйся, архиерее священный.

Песнь 7.

Ирмос:

Тебе, умную, Богородице, пещь, разсмотряем, вернии, якоже бо отроки спасе три Превозносимый, мир обнови, во чреве Твоем всецел, хвальный отцев Бог и препрославлен.

Тело, и ум, и душу очистив отъятием страстей, иерарше Прокле мудре, оттуду догматствовал еси, тело, и душу, и ум от Девы рождшагося Бога кроме пременения, за еже спасти ны, приемшаго.

Ты, ко Христу стяжав, святе, дерзновение, на земли хвалящим песнопесненно память твою славную всяких напастей избавитися моли, хвальнаго поющим Бога преславнаго.

Огнь разумный, в помышлениих вжег твоих, хврастную и гнилую злочестиваго Нестория ересь попалил еси. Темже ти молимся: хврастныя наша сласти, еже к Богу мольбами твоими, пожег, очисти, славне.

Богородичен: Носиши Бога, плотию обложена, на объятиях Твоих, Чистая, якоже престол херувимский, Носящаго вся глаголом силы Своея, Емуже песнопоем, веселящеся: препетый отцев Боже и препрославленный, благословен еси.

Песнь 8.

Ирмос:

В пещи отроцы Израилевы, якоже в горниле, добротою благочестия чистее злата блещахуся, глаголюще: благословите, вся дела Господня, Господа, пойте и превозносите во вся веки.

Яко в горниле светозарнем, всеславне, чистотою страсти плотския очистив, яко злато, всем возсиял еси, воспевая: вся дела Господа пойте и превозносите Его во веки.

Органом, блаженне, честнаго твоего языка, украшаема вещанием, Церковь Божия на земли спасительное низшествие воспевает, всем гласящи ясно и вопиющи: Тя превозносим, Христе, во вся веки.

Гусль божественная явился еси истинно, вещание возглашающая верою приемлющим Божие, еже к нам, спасительное воплощение, Прокле, отче блаженне, верою зовый: Господа пойте дела и превозносите Его во веки.

Богородичен: Сохранив знамения Твоего, Дево, девства невредна Владыка, пройде Бог из Тебе паче смысла, во еже спасти вопиющия: Господа пойте и превозносите Его во веки.

Песнь 9.

Ирмос:

Образ чистаго рождества Твоего огнепалимая купина показа неопальная; и ныне на нас напастей свирепеющую угасити, молимся, пещь, да Тя, Богородице, непрестанно величаем.

Образы и сени мимотек и истинно Христа разумев, породився банею крещения, священник же помазан священнейший. Темже и Богородицу, Того рождшую, проповедал еси.

Нравы священныя и догматы Златоустаго, блаженне, вперсил еси, ревность же его священную веры, изрыгнул еси догматов твоих пучину, ересей потоки изсушающую благодатию.

Устави священными твоими молитвами воздвизаемое на ны смущение и отжени напастей омрачение и человек всех озлобление, яко имея дерзновение ко Владыце и Богу нашему.

Богородичен: О, паче ума чудес Твоих! Божие бо Слово, плоть бывшее, едина родила еси преестественно, Мати Дево, всяческая Божественным хотением мудре Содержащаго, и окормляюща, и соблюдающа.