Русская Православная Церковь. Святцы

Канон святителю Стефану Сурожскому (второй) (Каноны святым)

Песнь 1.

Ирмос:

Христос раждается — славите! Христос с небес — срящите! Христос на земли — возноситеся! Пойте Господеви, вся земля, и веселием воспойте, людие, яко прославися.

Благодать Духа прием, отче, в сердцы твоем, Христов святителю, очисти язык же и сердце твоих певец, яко да твою память воспеваем светло, Стефане исповедниче.

Великий ныне Стефан, пастырь Церкве Сурожския, пастыря, вкупе и стадо, и весь Сурож светло призывает: приидите, собравшеся, яко общему отцу светло торжествуем.

Побеждают твоя исправления, и словеса, и вещи, Стефане, егоже ради душевное предложение приемли со благоуветием, достодивный, еже бо по достоинству песнь тебе плести всем невозможно.

Богородичен: Безмерна бездна Твоего непостижимаго рождества, Всечистая, сего ради, вернии, несомненно убо чисте припадаем Ти, глаголюще: радуйся, Богородице Дево, Мати Неневестная.

Песнь 3.

Ирмос:

Прежде век от Отца рожденному нетленно Сыну и в последняя от Девы воплощенному безсеменно, Христу Богу возопиим: вознесый рог наш, Свят еси, Господи.

Позна тебе от чрева, богоносе, Всеведый Бог, прежде возвещает тебе ангелом, освящает тебе путеводителя душам и пастыря великаго, якоже Петру, и тебе вверяет Свое стадо.

Жезлом воздержания страстей море разделил еси, блаженне, якоже Моисей, и на безстрастия гору вшел еси, прием разумныя скрижали, Церковь научил еси Христову закону духовному.

Смирен явился еси, кроток же и тих, Стефане, отнюдуже духовная благодать, довольне излиявшися в тебе, велика показа тя, чудес лучами землю Сурожскую осиявающа.

Богородичен: Тя, запечатанную истинно, лик пророческий, и заключенную источника дверь, нарече, девства Твоего, Всепетая, издалеча образы нам пишущь Тя, Юже соблюде и по рождестве.

Седален, глас 1.

Великий святитель Христов да воспоется, столп светлый, просвещаяй нас чудес светлостьми, и облак росный, пламень страстей погашающь и орошающь верных мысли, божественный Стефан.

Богородичен: Светлый светильниче, Божественная трапезо, кадильнице златая, стамно, манну носящая живоносную, верных мысли услаждающи, якоже пророцы Тебе, Дево, провозвестиша.

Песнь 4.

Ирмос:

Жезл из корене Иессеева и цвет от него, Христе, от Девы прозябл еси, из горы, Хвальный, приосененныя чащи пришел еси, воплощся от Неискусомужныя, Невещественный и Боже, слава силе Твоей, Господи.

Законом от сосец матерних подклонився духовным, закон плотских превшел еси, преподобне, яже прежде времене умертвил еси тяжких греховных; сего ради невернаго царя обличил еси, исповедник великий явлься, Стефане.

Сна очесем твоим и дремания веждом не дал еси, дондеже обрел еси место достойно всех блаженных, отче, сердце твое очистив достойне. Темже показа тебе жилище Свое Царь славы и Бог вечный.

Умертви мудрование, мудре, плоти нашея неисцельное и к Божественным настави ны стезям, яко крепок и силен, и законом благим повини, блаженне, и рабы покажи Христовы, порабощенныя страстьми лютыми.

Богородичен: Поем великое и страшное Твое таинство, еже премирных убо утаився, возвести Тебе чиноначальник, на Тя Сый сниде, яко дождь на руно, Всепетая, на спасение наше и обновление.

Песнь 5.

Ирмос:

Бог Сый мира, Отец щедрот, великаго Совета Твоего Ангела, мир подавающа, послал еси нам; тем, богоразумия к свету наставльшеся, от нощи утренююще, славословим Тя, Человеколюбче.

Яко великое богатство твоих щедрот явися Сурожскому роду безчисленно пролитие милости твоея, слуго Христов: ты бо, просящим сущая подавая, и тех насытити тщался еси твоим предложением, блаженне.

Кроток явився и смирен вкупе, делом же, и словом, и мыслию, сим вся к себе привлекл еси, любовию и добрыми делы. Царя же злославнаго обличив, сердца верных возвеселил еси, укрепляемых твоим исповеданием.

Великий Пастырь всех — Христос, овец тя, блаженне, показа Своих пастыря и учителя словесных. Темже заблуждаемых нас на горах погибельных, яко пастырь человеколюбив, ныне твоих овец взыщи.

Богородичен: Святых Святая Дево Чистая, святых Святаго родила еси, всяческая освящающаго, Христа Избавителя. Темже Тя, Царицу и Владычицу всех, яко Матерь Зиждителя тварей, величаем.

Песнь 6.

Ирмос:

Из утробы Иону младенца изблева морский зверь, якова прият; в Деву же всельшееся Слово и плоть приемшее пройде, сохраншее нетленну: Егоже, бо не пострада истления, Рождшую сохрани неврежденну.

Ты Сурожу быв просветитель и живущих в нем везде заступник, обуреваемых же в скорбех тихое пристанище, врачь душевных страстей вкупе и телесных, отнюдуже вси вкупе вещают и призывают твое имя.

Архиереи и священницы срадуются нам днесь, Сурожскому отцу празднующе, согласуют же и воспевают вкупе общии истиннии безмолвницы и простии вси нашему тебе воспевают предстателю вкупе и учителю.

Чадо порочное, аз един бых, отче, страстьми скверными, воистинну недостоин добраго твоего, славне, и краснаго празднования, но ты, очистив мою скверну, преподобне, душевную, покажи мя вечери твоей достойна.

Богородичен: Недр не отступль Безначальна Родителя, в недрех Чистыя Отроковицы водворяется и бывает безматерен прежде, ныне без отца воплощается, Иже присно царствуяй Христос; Сего неисчетен, и страшен род, и неизреченен.

Кондак, глас 3:

Вышняго силою, священне, укрепився, царева низложил еси иконоборная шатания; днесь Сурожу и нам верным предлежат слава и богатство — святыя твоя мощи, ихже свыше дароносят ангельстии чинове, песньми и пением славословят тя, великий священный Стефане.

Икос:

Твоего чистаго и непорочнаго жития кий язык человеческий восхвалити когда и воспети, преподобне Стефане, возможет, верою, и разумом, и истиною? Ибо во всех подвизех доблествен показался еси. Ты бо, всеблаженне, лютаго царя посрамил еси, честь же иконы восходити на первообразие научил еси, святе, и отцев догматы, всемудре, исповедал еси; сего ради тя ублажаем, великий священный Стефане.

Песнь 7.

Ирмос:

Отроцы, благочестию совоспитани, злочестиваго веления небрегше, огненнаго прещения не убояшася, но, посреди пламене стояще, пояху: отцев Боже, благословен еси.

Земля Сурожская и страны, отче, чудеса твоя возвещают убо и воспевают всюду, учащеся пети радостно: отцев Боже, благословен еси.

Жених, красный паче всех сынов человеческих, якоже есть писано, невесте, блаженне, Своей Церкви, краснейша тя показа жениха, Того носяща образы подобия, отцев Бога и препрославленна.

Украсив твое житие милостынею, и кротостию, и любовию, светлоподобник показался еси изрядный Пастыря Добраго, избрав Того добродетели добре, Емуже поем: отцев Боже, благословен еси.

Богородичен: Тя Иаков, Богородице, лествицу пророчески разумевает, Тебе бо ради Превозносимый на земли явися и с человеки поживе, якоже благоволи, Воспетый отцев Бог и препрославлен.

Песнь 8.

Ирмос:

Чуда преестественнаго росодательная изобрази пещь образ: не бо, яже прият, палит юныя, яко ниже огнь Божества — Девы, в Нюже вниде утробу. Тем, воспевающе, воспоем: да благословит тварь вся Господа и превозносит во вся веки.

Окорми молитвою твоею Церковь твою многочеловечную и бури ветр противных чувственных и мысленных устави твоими молитвами и запрети, и избави всяких искушений и смущений, и даже до конца неврежденную соблюди.

Падоша востающии на ны, отче, твоими молитвами побеждаеми, агаряни внуцы, хотящии достояние твое озлобити, и смех убо быша, и ругание, падения своего плачуще; мы же воспеваем радостно твою священную память.

Неизреченно твое чадолюбие, отче, превосходяще отеческую любовь: всегда убо прирадееши, невидимо нас посещая бодренными твоими молитвами, спасение нам всегда содевая и подавая нам с тихостию, Стефане, радостная.

Богородичен: Всего мя, отпадша, Богородице Дево, и сокрушивша, еже по образу, Чистая, Бог Своего создания не презре, но Тобою всего мя обнови. Сего ради Тя, вину спасения нашего, вся тварь воспевает, зовущи: благословена Ты в женах еси, Всенепорочная.

Песнь 9.

Ирмос:

Таинство странное вижу и преславное: небо — вертеп; престол херувимский — Деву; ясли — вместилище, в нихже возлеже Невместимый — Христос Бог, Егоже, воспевающе, величаем.

Славу твою воспети по достоинству невозможно: чудеса бо твоя многа и исцеления безчисленна независтно подаеши с теплою верою приходящим, Стефане святителю, похвало рода Сурожскаго.

Постави тебе Церкви Своей основание Христос, столпа крепка и неподвижна во веки, соблюдающа и назирающа град свой незыблен и во веки века ненаветуемь и от всяких избавляюща нападаний верою совершающих священную твою память.

Архиереи убо, священницы же и монаси и вси людие, мужие и жены, и отроковицы, старцы со младенцы, и всяк возраст, и всяко достояние святителю Стефану Сурожскому светло празднуем.

Богородичен: Неизреченно Девы таинство: Та бо престол херувимский и светоносный чертог показася Вседержителя Христа Бога. Юже благочестно, яко Богородицу, величаем.

Светилен.

Давидски процвел еси в дому Господни, яко финикс, отче преподобне, плод твоих трудов стократно ныне умножил еси. Темже облак демонов тучами слез твоих, блаженне, погрузив, от Христа почесть и венец победы приял еси и чудес, премудре, независтно богатую милость.

Богородичен: Христову ныне престолу предстоя, святителю, с Богоматерию и Пречистою Девою моляся не престай победы на варвары стране нашей даровати и мир миру и душам спасение, премудре, совершающим, о Стефане, память твою, святителем красото.