Святцы: Соообщество Православных Прихожан

Канон святому священномученику Феодоту Анкирскому (Каноны святым)

Песнь 1.

Ирмос:

Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Богосиянную тя звезду мысленное показав Солнце на высоте Своея Церкве, всю землю блистаньми, блаженне, твоих страданий уясни.

От юна возраста возложен быв Богу, Феодоте, богоданными добродетельми душу просветил еси яве и мир честными страдании украсил еси.

Славный мученик, смотряя льстиваго мрежи, простерты на земли, всюду прохождаше, души ученьми благочестивых утверждая благодатию.

Богородичен: Премногим милосердием небеса преклонь, сниде Сын Божий и из Тебе воплотися, Чистая, спасая человека от прелести змиины.

Песнь 3.

Ирмос:

Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Выну взирая к Богу очесы умными, приснопамятне мучениче, не чул еси ран, телеси приближающихся, и муками всюду одержимь.

Никакоже, мучениче, прилоги болезненными поколебался еси, ни ласкании беззаконных, на камени твердыя веры Христовы водружен, славне Феодоте.

Сокрушая тело многими ранами, гонитель не возможе отнюд твоея крепости душевныя разслабити, Божественною любовию Спаса, блаженне, утверждаемь.

Богородичен: Видев Твоего издалеча лик пророческий богогласный таинства глубину, многообразными гласы Богу Матерь Чистую Тя проповедует, Пречистая Богоневесто.

Седален, глас 1.

Многосветлая звезда, даровании чудесными и страдании священными озаряя тварь, Феодоте блаженне, воистинну был еси. Темже днесь светоносную твою память празднующе, в веселии сердца Христа величаем.

Богородичен: Безневестная Чистая Богородице Дево, едина верных предстательнице и покрове, бед, и скорбей, и лютых обстояний всех избави, на Тя упование, Отроковице, имущих, и души наша спаси Божественными молитвами Твоими.

Крестобогородичен: Нескверная Агница, Агнца и Пастыря, повешена на древе, мертва зрящи, плачущи, вещаше, матерски восклицающи: како претерплю Твое еже паче слова, Сыне Мой, снитие и вольныя страсти, Боже Преблагий?

Песнь 4.

Ирмос:

Христос моя сила, Бог и Господь, честная Церковь боголепно поет, взывающи, от смысла чиста, о Господе празднующи.

Мудростию словес твоих и дел благодатию тмы предстателя яве посрамил еси, Феодоте, и победу взял еси на него, славно подвигся.

Огнем страданий твоих яве запалил еси многобожную лесть и, яко свеща, Духом Святым, мучениче, вжегся тайно, подсолнечную просветил еси.

Крепко, славне, в ребра стружемь и зельными болезньми яко воистинну всюду окружен, непоколеблемь умом познался еси веры ради, приснопамятне.

Богородичен: Сохранив нетленну Тя по рождестве, якоже прежде рождества, Дево, Содетель вселися в ложесна Твоя и истлевшия многими согрешении обнови.

Песнь 5.

Ирмос:

Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Терпением твоим, мучениче мудре, беззаконнующих стремления, и мук озлобления, и опаления яве терпел еси, Божественным пособием огражден.

Проповедуя слово благочестивое, путная шествия далече, мучениче богомудре, шествовал еси и заблужденныя к свету обратил еси, тмою водимыя суетства.

Воздвижен быв, якоже агнец, мучениче, на древо, железных ногтей терпиши терзания, якоже безплотен, блаженне, умерщвления дебельство совлачая.

Богородичен: Воплощенно воистинну Слово Отчее от чистых, Чистая Дево, кровей Твоих родила еси, во двою совершенну естеству, единой же ипостаси, Богорадованная.

Песнь 6.

Ирмос:

Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Помазал еси словесы твоими священными чистыя к подвигом жены, и, низложше, мучениче, врага мужескими борении, нетления венцы исплетоша.

Крепостию духа душу оградив, лукавствия духи терпением ран низложил еси и победы венец от Бога приял еси, досточудне.

Каплями кровей твоих идольский пламень, мучениче Христов, погасил еси и росою болезней твоих благочестивых души оросил еси, от пламене прелести избавив.

Богородичен: Иже всей отнюд разумней яко Бог и видимей твари во утробу Твою вселися воистинну и плоть бысть, человеки назидая, Приснодево.

Песнь 7.

Ирмос:

Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Огнем, богоблаженне, болезней твоих запаление идольское угасил еси, кровными же потоки погрузил еси враги безплотныя, Феодоте, вопия: благословен еси, Боже отец наших.

Яко фимиам благовонен, принеслся еси, мудре, Подвигоположнику твоему, Божественною благодатию злосмрадную лесть низлагая. Тем поеши радостно: благословен еси, Боже отец наших.

Соблюд твоя словеса Форт святый, богоносному Фортону отдаде тя, храму на воздвижение честну, на очищение всех благочестивых, в снабдение душам, мучениче Феодоте.

Богородичен: Едину Носящаго ипостась родила еси Слова, Мати Дево, сугуба имуща хотения и естественная Его свойства яве: Бог бо есть и Человек, нас ради воплотивыйся.

Песнь 8.

Ирмос:

Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Непоколебимь столп, забрало непреклонно, непобедимая стена, степень веры, дание Божественное, благочестия поборник, прелести губитель показался еси, страстоносче.

Правлением Божественныя благодати, премудре, мук прешел еси великую пучину и тихая, радуяся, достигл еси, славне, пристанища горняго Царствия.

Шествия и стези твоя направишася ко Христу, всех Богу и Господу, Емуже в руце дух твой предал еси, мучениче страстоносче, Феодоте треблаженне.

Богородичен: Риторов язык таинства Твоего недоуменную глубину изрещи не может: Слово бо Божие паче слова родила еси, Пречистая Дево, во спасение всех.

Песнь 9.

Ирмос:

Бога человеком невозможно видети, на Негоже не смеют чини ангельстии взирати; Тобою бо, Всечистая, явися человеком Слово воплощенно, Егоже величающе, с небесными вои, Тя ублажаем.

Да славы улучиши оныя, страстотерпче, видимую, радуяся, преобидел еси и, Божественным манием к ранам отлучився, не ужаслся еси мучительных вид и смерти горькия. Темже с мученики венчался еси, подвигся.

Явился еси храм, мучениче, чист Троицы зданием деяний, Феодоте пребогате, Божественных, страданий же светлых сиянием украшен. Темже храмы демонския истуканныя, мудре, Божественною Утешителя силою яве низвергл еси.

Искапающая гора Божественную сладость явился еси, источник чудес, пучина же, славне, Божественных дарований, струя светла Святаго Духа, души напояя, и потопляя страсти, и всем ходатайствуя, мучениче, благочестно поющим тя, радование.

Богородичен: Гласом ангела родила еси Безначальнаго Слова, приемшаго плоть умну же и одушевленну, Дево Всечистая, от чистых кровей Твоих, и безплотныя враги низложшаго, и спасшаго нас всех, истинную Богородицу исповедающих Тя.