Русская Православная Церковь. Святцы

Канон святому священномученику Ферапонту, епископу Сардийскому (Каноны святым)

Песнь 1.

Ирмос:

Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Со священными лики на Небесех ликуя всегда, чтущия на земли святую память твою, страстей и бед лютых, Ферапонте, избави.

Простираемо в мире священное и честное твое страдание, возставляет верныя в то, славити тя, светло доблествовавша, мудре Ферапонте, благодатию.

Богосиянну тя звезду, мысленное солнце показав, подвиг твоих светом и чудес сиянием верныя озаряет, священно восхваляющия тя.

Богородичен: Священный лик пророческий предсказаше издалеча, хотящу Тя быти Божию Родительницу, Чистая, вышшу Херувим и всякия твари.

Песнь 3.

Ирмос:

Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Угодник был еси Христов, истинно нося и подобно, мучениче, твое звание воистинну, и целиши душ и телес всегда недуги.

Кровь, с мастию смешшися, твое священство светлейше творит, святителю и пастырю, мучениче и врачу болящих, темже восхваляем тя.

Целиши страсти лютыя верно приступающих, и недуги уставляеши, и духов лукавых очищаеши вред Христовым призыванием Божественным, всеблаженне.

Богородичен: Разумети рождества Твоего, Чистая, неизглаголанную глубину недоумеет ум человеч: Бог бо, излияв Себе за милосердие, во утробе Твоей, всего мя обнови.

Седален, глас 1.

Угодниче Христов, пострадав законно, явился еси истинен святитель и мученик. Темже молим тя: душ наших, святе, ныне уврачуй неудобьисцельныя страсти, Человеколюбца и Волителя милости Христа умоли.

Слава, и ныне: Настави нас на путь покаяния, уклоньшияся присно к безпутием зол и Преблагаго прогневавшия Господа, Неискусобрачная благословенная Марие, прибежище отчаянных человеков, Божие жилище.

Крестобогородичен: Зрящи Тя, Христе, Всенепорочная Мати, мертва на Кресте простерта, вопияше: Сыне Мой, собезначальне Отцу и Духу, что неизреченное Твое сие смотрение, имже спасл еси пречистых рук Твоих, Щедре, создание?

Песнь 4.

Ирмос:

Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

Очистив первее от страстныя молвы душу, приял еси, священнодейственне, помазание Божественно свято и при кончине страдальческим украсился еси венцем.

Знамении всегда и Божественными чудесы сияя, видишися и облистаеши всю подсолнечную, благодать от Бога прием, святителю досточудне.

Упасл первее люди благодатию, безкровными жертвами, яко святитель, священно освящ и, яко агнец, заклан быв, Господеви приведеся.

Богородичен: Яко дверь, ведущую к Божественному входу, яко рай Божественный, яко разумно место освящения, яко доброту Иаковлю, Деву ублажим.

Песнь 5.

Ирмос:

Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Божественным сиянием озарився, явился еси пресветлая звезда, просвещая подсолнечную Божественными знамении Божиим Духом, Ферапонте, святителю Богоблаженне.

Яко всесожжение священно, яко приношение, отче, приятно и жертва совершенна, плотию пострадавшему Слову принеслся еси, Ферапонте святителю, мученик быв.

Чашу налияв всекрасно исповедания воистинну, крепким твоим страданием всех напояеши, Ферапонте преподобне, с высоким проповеданием призывая.

Богородичен: По рождении страшнем пребыла еси Девою, якоже прежде: Бог бо бе рождейся, устрояяй вся волею, безневестная Марие, Богоблагодатная.

Песнь 6.

Ирмос:

Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Житие твое Божественно, жизнь боголепна и славна смерть, мученическими сияя добротами, чудес светлостьми озаряя сердца поющих тя.

Плодовиту лозу тя винограда истиннаго, разумнаго познахом, исповедания гроздие истинно принося, источающее терпения, Богомудре, вино изрядно.

Храм твой показася врачевство священно, облегчая благодатию всякия болезни немощных и реша недуги, святителю Богомудре, досточудне.

Богородичен: Слово во утробе Твоей одебеле без семене, и Человек явися совершен, обновляя естество богоподобно, якоже един весть, Боговместимая двере, Всенепорочная.

Песнь 7.

Ирмос:

Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Страстей треволнение укротив воздержанием, преподобне, пострадав же, наводнением погасил еси твоих кровей прелести запаление, священномучениче Христов, Ферапонте преподобне.

Совершился еси миром помазания, священнотаинниче преподобне, и, совершив священники и народ, яко пастырь, совершил еси течение доброе, заклан быв за Христа, Ферапонте, мучениче мудре.

Течением кровей твоих погрузил еси вражия полки, чудес же сиянием мрак страстей разоряеши, Ферапонте, воистинну чудодейственник явлься и врач немощных.

Богородичен: Седяй в недрех Родителя неописанно, Чистая, в недрех Твоих ныне седит, описан, Твоим обложен зраком, за еже спасти Адама, нов Адам быв.

Песнь 8.

Ирмос:

Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.

Безкровны жертвы Богу принесл еси и пожерлся еси, яко агнец чист, непорочен; демонския жертвы потребил еси, красота страдальцев, Ферапонте святителю.

Рая житель Божествен быв, и святых Ангелов явился еси сопричастник, мученическою сияя светлостию, мучениче страстоносче и служителю Спасов.

Гордаго змия ты смирил еси смирением сердца, сопротивлься сему мужески и мученическою кровию обагрив, святителю, священную одежду твою.

Богородичен: Избавльшеся первыя клятвы Рождеством Твоим, Всеблагословенная Отроковице Богорадованная, Гавриилов Тебе глас возсылаем: радуйся, виновная всех спасению.

Песнь 9.

Ирмос:

Бога человеком невозможно видети, на Негоже не смеют чини ангельстии взирати; Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.

Видети славу Вседержителя желая, неправедную претерпел еси смерть, и твоею возшел еси кровию, святителю славне, якоже на колеснице, и, к Небесем востекл, радуяся, почил еси.

Яко свет, яко утро, нам возсиял еси светлыми зарями, озаряя концы, святителю и пастырю Богодохновенне, и страстей решиши омрачение. Темже тя почитаем и благочестно ублажаем.

Сый с лики, Богоблаженне, патриарх и мученик, апостол, и праведник, и преподобных, с сими молися разрешение согрешений всем даровати, творящим благочестно Божественную память твою.

Твоего храма, мучениче, благолепие, блистании чудес всегда просвещаемо, верою приступающим в дусе разрешает страстей мрак, уставляет недуги, мучениче святителю и пастырю досточудне.

Богородичен: Светом Твоим, Богоблагодатная, в женах Дево, просвети мя, молюся, и огня вечнаго мя избави; яко да величаю Тя, яко да Тя славлю, яко да по долгу воспою величия Твоя.