Святцы: Соообщество Православных Прихожан

Канон святому священномученику Мефодию Патарскому, Олимпийскому (Каноны святым)

Песнь 1.

Ирмос:

Манием Твоим на земный образ преложися прежде удоборазливаемое водное естество, Господи. Темже немокренно пешешествовав, Израиль поет Тебе песнь победную.

Стези скорыя, к Богу мя носящия, показуя преход, священнотаинниче, научи, яко да безконечную улучу жизнь молитвами твоими, славне.

Облистал еси светоносно во Христове Церкви, сугубыми сияя, священноявленне, благодатьми. Темже сугубыми тя венцы священнолепно Христос венча.

Венцем мучения, священства же мастию, блаженне, украшаемь, обоими просиял еси. Темже истинное и боговидное наследие получил еси.

Яко непорочна жертва, и священна Владыце, и жива, и одушевленна священнодействовася, славне, темже жертвеннику Небесному прият был еси, Мефодие.

Богородичен: Избавителя человеческаго рода, и Свободителя, и Спаса Христа нам родила еси, Дево Мати Чистая. Темже, яве Тя ведуще Ходатаицу живота вечнаго, славим.

Песнь 3.

Ирмос:

В начале небеса всесильным Словом Твоим утвержей, Господи Спасе, и Вседетельным и Божиим Духом всю силу их, на недвижимем мя камени исповедания Твоего утверди.

Распалающуся видев Оригенову прелесть, яко сый изряден пастырь, Божественным огнем скоро попалил еси всю онаго мглу, блистающую лучу вжег премудрости твоея, Богоприятне.

Девство честное и чистоты доброту искусом, славне, навык, премудростию твоею и словес благодатию всех сих доброту показуеши, Богомудре, и вечнующую светлость.

Твоих словес молния, и разума труба, и учений благонарочитое вещание во всю землю изыде, преподобне, вся зовущи верныя к причастию, преблаженне, Небесных наслаждений.

Крепчайшею пищею духовных напоений насыщшиися, премудре, твоих истинною пищею оною наслаждаются, пребывающею, приснотекущею не мимоходно и растущею причастником.

Богородичен: С Божественным Гавриилом, благословенная Дево, Тебе, радуйся, зовем присно: радости бо нам вина была еси и веселия истиннаго, Избавителя и Спаса всех плотию рождши.

Седален, глас 4.

Жертвенник красен сердце твое сотворил еси, безкровны, священнодейственне, принося жертвы Богу, пострадав же крепко и пожерся, принеслся еси жертва, Мефодие, нас ради пожершемуся. Егоже прилежно моли присно вся спасти, любовию поющия тя.

Богородичен: Нечистых помыслов моих множество и безместных мыслей обуревания кто изрещи может, Всенепорочная? Настояния же безплотных враг моих кто исповесть и сих злобу? Но Твоею мольбою, Благая, сих мне всех избавление даруй.

Крестобогородичен: Иже от Безначальнаго Отца рожденнаго напоследок Тя плотию рождшая на Кресте висяща зрящи, Христе, – увы Мне, любезнейший, Иисусе, – вопияше: како славимый яко Бог от Ангел, от беззаконных ныне человек, Сыне, хотя распинаешися? Пою Тя, Долготерпеливе.

Песнь 4.

Ирмос:

Отча недра не оставль и сошед на землю, Христе Боже, тайну услышах смотрения Твоего и прославих Тя, едине Человеколюбче.

К добродетелей высоте, мученически скончався, востекл еси, великодаровное воздаяние священнодействия твоего прием, преблаженне.

Престол имея святительский, священную же жизнь стяжав, православную проповедал еси веру, всечестне, и научил еси твое стадо.

Сладость душеполезная твоих учений, яко источник, происходит, причастники веселя и услаждая душевная наша чувства.

Богородичен: Отеческих недр не отступль и от Девы воплощся, Христе Боже, сохрани стадо Твое, строения Твоего покланяющееся Божественным образом.

Песнь 5.

Ирмос:

Господи Боже мой, от нощи утреневав, Тебе молюся: подаждь ми оставление прегрешений моих и к свету Твоих повелений пути моя направи, молюся.

Мертвостию живоносною облеклся еси, отче, прежде скончания твоего и, мечем усечен мучения твоего, к жизни многосугубней преставился еси, славне, лучшей.

Таинниче неизреченных и общниче Вышняго ликостояния, любовию чтущия тя спаси, преславне, искушений лютых наития разоряя молитвами твоими.

Имея ко Владыце дерзновение, отче, Егоже и страсти усердно поревновал еси подвиги твоими, верным Божественный мир и тишину испроси, премудре.

Первее священнодействовал еси Агнца Божия, грехи мира вземлющаго, последи же, закалаемь, словесна и жива жертва Сему принеслся еси, отче Мефодие.

Богородичен: Чистая Богородице, мою душу омраченную, приятелище сущи неразоримаго Света и храм Божественныя зари, светом Твоим просвети, молюся.

Песнь 6.

Ирмос:

Плавающаго в молве житейских попечений, с кораблем потопляема грехи и душетленному зверю приметаема, яко Иона, Христе, вопию Ти: из смертоносныя глубины возведи мя.

Дремания веждам и очима твоима сна, преблаженне, не дал еси, дондеже всех страстей себе свободил еси, и вместителен храм соделал еси зарелучней молнии Духа.

Весь Божественному и Боговидному сиянию, Богомудре, соединяяся, Божественнаго священства правило был еси и к Богу ходатай явился еси всей Церкви верных, Мефодие.

К светлому житию светлостное совокуплься сущих откровение, Богоглаголиве, светлаго светильника миру тя показа, еретическое глумление и безбожия тьму отгоняща.

Богородичен: Царицу всех бывших Тя ведяще, Бога бо родила еси, Богомати, от не сущих вся сотворшаго, радостное песнословие со Ангелом Гавриилом Тебе зовем.

Кондак, глас 4.

Священнотаинник Святыя Троицы, и яже паче ума повелений Божественных проповедник, и православным утверждение был еси, Мефодие, злославныя обличил еси смыслы, правоверия ради кровию твоею священномученик явлься, и, Христу со Ангелы предстоя, моли спастися нам.

Песнь 7.

Ирмос:

В пещь огненную ввержени, преподобнии отроцы огнь в росу преложиша, воспеванием сице вопиюще: благословен еси, Господи Боже отец наших.

Освящен, Богомудре, и мучеников истины светло сияя кровию, с ними Владыце поеши непрестанно: благословен еси, Господи Боже отец наших.

Утвержден верою, идольский угасил еси пламень токи святых кровей твоих, мучениче, сице взывая: благословен еси, Господи Боже отец наших.

Научен Божественным видением превышним, ум премудро уяснил еси, с верно поющими, отче, взывая: благословен еси, Господи Боже отец наших.

Богородичен: Песнословием славит Твое Рождество вся тварь, Бога, Дево, ведящи, и, честно покланяющися, Тому зовет: благословен еси, Господи Боже отец наших.

Песнь 8.

Ирмос:

Единаго Безначальнаго Царя Славы, Егоже благословят Небесныя силы и трепещут чини Ангельстии, пойте, священницы, людие, превозносите Его во веки.

Тя, Невидимаго, яко виде, терпяше мучителей раны Богомудрый и венцем увязеся, поя: пойте, священницы, людие, превозносите Его во веки.

Непреемлемое Христово Царство светло желая, святителю, сие тебе исходатайствовавшу правою стезею, зовый Христу: людие, превозносите Его во веки.

Многосугубну Христос тебе подаде твоим трудом мзду, Богоносе, мысль преходящую всяку, поющу благочестно Того Царство во вся веки.

Учений пучину, и скрижаль наказаний, и зрения высокаго сокровище тя знаем, и чувств престол, поюще благочестно Христа Царя во вся веки.

Богородичен: Рабски, Пречистая, Тебе прихожду верою, заченшая всех Владыку: ныне спаси мя гонения и бед, поюща благочестно Бога, воплощеннаго из Тебе, Богородительнице.

Песнь 9.

Ирмос:

Мати Божия и Дева, рождшая и девствующая паки, не естества дело, но Божия снизхождения, тем, яко Едину, Божиих чудес сподобльшуюся, Тя присно величаем.

Всегда Христа моли, Богоблаженне отче, ересей уставити еже на ны коварства и нынешний мрак от среды отжени, яко бо святитель силен молитвенник был еси.

От земли к Небесней жизни преставился еси, служения твоего почесть прием и страдания, идеже жизни нетленныя причастник быв, вечно быти со Христом сподобился еси.

Древа жизненнаго плод объял еси, безсмертныя, преблаженне, жизни, человеком Первоначальника приобрет, Егоже радости наслаждаяся богатно, о поющих тя верою молися.

Весь ум простирая, преподобне, благостию жития, Христова зрения и краснаго веселия сподобился еси, яко священномученик и сказатель благочестия и поборник.

Богородичен: Закона новаго ковчег нарицаем Тя и Богоначертанную скрижаль, в нейже Слово написася Божие, Человек быв, за еже спасти мир от лести, обрадованная Богородице Всепетая.