NULL

Именины Феодор

Имя Феодор почитается в православии 89 раз в 2020 году. День Ангела - одна из этих дат. Чтобы определить День Ангела Феодор вашего знакомого, надо найти день памяти святого, следующий за датой его рождения.
Полное имя:

Церковное имя:

Феодор

Ближайшие именины Феодор - 02 октября
Феодор Ростиславич Черный, Смоленский, Ярославский

Жития благоверных князей Феодора Смоленского и чад его Давида и Константина, Ярославских чудотворцевСвятой благоверный князь Феодор Смоленский и Ярославский, по прозванию Черный, родился в грозную для Руси годину монгольского нашествия, около 1237–1239 года, и

Читать далее
Даты именин Феодор в 2020 году по православному календарю img title

Святые с именем Феодор в 2020 году почитаются 89 раза. Одна из этих дат - День Ангела человека, носяцего имя Феодор.

Ближайшие именины

Январь

Февраль

Март

Апрель

Май

Июнь

Июль

Август

Сентябрь

Октябрь

Ноябрь

Декабрь

Что подарить на именины?

Ниже вы можете найти православные подарки для на именины (День Ангела). Наша церковная лавка Святцы открыта для Вас!

Поиск по имени

Молитвы к Феодор

Тропарь священномученику Феодору Богоявленскому

Церкве Русския столпе непоколебимый,
благочестия правило,
жития евангельскаго образе,
священномучениче Феодоре,
Христа ради пострадавый даже до крове,
Его же моли усердно,
яко Начальника и Совершителя спасения,
Русь Святую утвердити в Православии
до скончания века.

Кондак священномученику Феодору Богоявленскому

Восхвалим, вернии,
изряднаго во святителех (или священницех)
и славнаго в мученицех Феодоре,
Православия поборника и благочестия ревнителя,
земли Русския красное прозябение,
иже страданием Небесе достиже
и тамо тепле молит Христа Бога
спастися душам нашим.

Молитва священномученику Феодору Богоявленскому

О, избранниче и угодниче Христов, священномучениче Феодоре, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! Ты во время гонения безбожнаго от сокровищницы души твоея спасительное исповедание Православныя веры изнесл еси, и людем верным пастырь добрый явился еси, душу твою за Христа и Его овцы полагая и лютыя волки далече отгоняя. Ныне убо призри на нас, недостойных чад твоих, умиленною душею и сокрушенным сердцем тя призывающих. Умоли Господа Бога, да простит согрешения наша и избавит от адовых уз и вечнаго мучения. Утверди нас в вере святой, научи нас всегда творити волю Божию и хранити заповеди церковныя. Буди пастырем нашим - правило веры, воином - вождь духовный, болящим - врач изрядный, печальным - утешитель, гонимым - заступник, юным - наставник, всем же благосердый отец и теплый молитвенник, яко да молитвами твоими соблюдется в Православии Святая Русь и непрестанно славится в ней имя Пресвятыя Троицы, Отца и Сына и Святаго Духа во веки веков. Аминь.

Тропарь преподобного Феодора, князя Острожского, Печерского, в Дальних пещерах

Преобразил еси земнаго княжения славу
во иночества образ смиренный,
и вместо врагов видимых
на невидимыя ополчился еси,
и, обою победитель красен являяся,
един от чудотворец Печерских показался еси;
темже и нам ревности Божия дар испроси,
братолюбием сердца наша просвети
и ко спасению вечному стези наша, Феодоре блаженне, направи.

Ин тропарь преподобного Феодора, князя Острожского, Печерского

Княжеских дароношений и всего суетствия мирскаго спешне отвергся,
Божиих же дарований, премудре Феодоре, преискренне сподобитися желая,
приял еси иноческий образ
и, в нем смиренным послушанием и безмолвным житием Царю Небесному благоугождая,
получил еси от Него безсмертныя дары,
ихже и нам, чтущим тя,
получити молися.

Ин тропарь преподобного Феодора, князя Острожского, Печерского

Яко благочестиваго корене пречестная отрасль был еси,
блаженне Феодоре,
яви бо тя Христос
яко воистинну богодарованное сокровище Волынстей земли,
новаго поборника веры Православныя,
и народу российскому преславна и благоприятна.
Темже ныне, плоды светоносных трудов твоих
в стране нашей под сению Святыя Церкве Православныя наслаждающеся,
хвалим Господа,
даровавшаго тебе силу и крепость на сопротивныя,
Егоже моли спасти отечество твое,
и державе сродник твоих богоугодней быти,
и сыновом российским спастися.

Кондак преподобного Феодора, князя Острожского, Печерского

Красоты ризныя возгнушавшагося
и богатства тленнаго со благодарением отвершагося,
в ризу же безстрастия облекшагося
и богатому в щедротах Христу возследовавшаго,
приидите, вернии, восхвалим Феодора достославна,
яко молящася непрестанно
о душах наших.

Молитва преподобному Феодору, князю Острожскому

Воинствование земное на духовную брань преложивый и о людех своих доброе попечение показавый, блаженне Феодоре преподобне. К тебе в смятении сердец наших днесь прибегаем и твоея помощи стране нашей и душам нашим смиренно просити дерзаем, вемы, угодниче Божий, яко малодушие наше и леность духовная далече от твоея пажити ны отревает и всякаго омерзения достойны ны соделовает, но милосердие твое ко врагам и предателем твоим поми­нающе, имже паки защитник явился еси, равнаго милосердия твоего и нам, недостойным, молим. Ты убо, угодниче Христов, от агарян разоренную землю нашу и от иноверные подавляему жалостию и любовию объемля, паки к бодренному житию верныя призвал еси, елико воинскими победами, толико и молитвою и образом жития своего, аки свещник златый, блистаяся. Ты, мирскаго жития суету оставль, сам убо о душе своей попечение в пещерном уединении предался еси, земли же нашея попечение и исцеление славному роду твоему заповедал еси, и тако предел свой еще на двести лет и вящше по кончине твоея от сетей еретических оградил еси. Ты далече сущее единокровное нам племя чешское ко православной вере приближати тщался еси и от латинскаго нашествия ограждал еси. Ты и ныне, на небесех душею со Ангелы водворялся, нетленным же телом посреде нас почивая, наша не отрини гласы скорбныя, но молитвенный плач согрешающих сынов земли нашея услыши. Согре­шихом бо и неправдовахом и от завет Божиих отступихом, в развра­щенныя обычаи зле впадохом, и еже едино на потребу есть, душ наших спасение, небрежение оставихом, тебе в Бозе правда и слава, отче преподобне, нам же стыдение лица. Обаче елико грешнейшии явихомся толико вящшаго сострадания твоего требуем и в покаянии зовем ти сице: твоея неистощимыя любве луч нам ниспосли, гнев Божий, праведно на ны движимый, молитвою твоею от нас отведи, спасительную благодать Его к нам, недостойным, предстательством твоим низведи и от греховныя бездны к высоте покаяния нас возведи, да тако и мы житие свое исправити потщимся, крепость земли нашея паки обновляти начнем, врагов же веры Христовы и злых прелестников безбоязненно отражати словом и житием возревнуем и Спасителя нашего со всеми святыми благо­дарно воспевати будем, славяще Его со Отцем и Святым Духом во веки веков. Аминь.

Тропарь святителю Феодору, епископу Едесскому

Апостолом подражатель
и божественных учений столп бысть,
тем ко Христу притече,
молением, блаженне, Моавия царя светом Крещения просвещена показа, Феодоре,
и исповедания ради кровь свою излиял есть,
исходатайствен тому явися венец от Христа Царя,
Егоже моли спасти души наша.

Тропарь иной святителю Феодору, епископу Едесскому

Неволею паству святительскую приим,
но волею подвигнувся о Божий Церкви,
и перстию Христова гроба невернаго Моавия царя уверив,
и с телесною слепотою вкупе и душевную ему исцелив, благоверна показа,
с нимже и еретики от Божия Церкве, яко волки, отгнав,
честный святителю Феодоре,
моли спастися душам нашим.

Кондак святителю Феодору, епископу Едесскому

Яко солнце, осиявая светлым житием, Феодоре, яве,
вавилонскому царю явися чудесы
и сего угодника Христу, святителю, показа,
с нимже ныне Троице предстоя,
нас поминай, светло торжествующих память твою, мудре.

Кондак иной святителю Феодору, епископу Едесскому

Благохотения ради
просвещеннаго тобою по благодати чада, честнаго Моавия,
животворящаго древа получения,
подвигнуся во царствующий град,
и тамо Христовою перстию доблей царице Феодоре ока зрение очисти,
и оттуду с желаемым сокровищем паки в Вавилоне честнаго Моавия по Христе на мучение утверди,
сего ради ти вопием:
радуйся, честный Феодоре,
учениче Христов, пастуше добрый.

Тропарь священномученику Феодору Лебедеву

Церкве Русския столпе непоколебимый, благочестия правило жития евангельского образе, священномучениче Феодоре, Христа ради пострадавый даже до крови, Его же моли усердно, яко Начальника и Совершителя спасения, Русь Святую утвердити в православии до скончания века.

Кондак священномученику Феодору Лебедеву

Восхвалим, верни, изрядного во святителех и славного в мученицех Феодора, православия поборника и благочестия ревнителя, земли Русския красное прозябение, иже страданием небес достиже и тамо тепле молит Христа Бога, спастися душам нашим.

Величание священномученику Феодору Лебедеву

Величаем тя, священномучениче Феодоре, и чтим честная страдания твоя, яже за Христа во утверждении на Руси Православия претерпел еси.

Тропарь Константину (Ярославу) и чадом его Михаилу и Феодору, Муромским

Константин днесь весело ликовствует,
предстоя Престолу Пресвятыя Троицы,
видя отечествие свое, мастию духовною сияющее:
емуже последоваша Михаил и Феодор, сынове его,
и молятся вси трие вкупе о душах наших.

Кондак Константину (Ярославу) и чадом его Михаилу и Феодору, Муромским

Изрядному воеводе и правоверному князю Константину, с сынома его вкупе, отечество его хвалящися вопиет, имеющее его начальника и заступника, яко избавльшееся им от прелести и скверны идольския: сего ради вопием ему сице: радуйся, княже Константине, преблаженне.

Тропарь преподобного Феодора

Пустынный житель, и в телеси Ангел,
и чудотворец явился еси, богоносе отче наш Феодоре:
постом, бдением, молитвою небесная дарования приим,
исцеляеши недужныя и души верою притекающих ти.
Слава Давшему тебе крепость,
слава Венчавшему тя,

слава Действующему тобою всем исцеления.

Кондак преподобного Феодора

В дому Божии, яко финикс, процвел еси,
плоды же добродетелей Господеви принесл пощением изрядным,
отче преподобне,
темже и ублажаешися,

яко Безплотных равностоятелен.

Тропарь Феодору и Василию Печерским, в Ближних пещерах

Союзом любве связавшеся, преподобнии,
 всяк союз козней вражиих попрасте,
 страдание же и смерть неповинне
 от сребролюбиваго князя претерпесте добле,
 тем молим вас, вкупе поживших
 и венцы мучения приемших,
 молитеся Господеви о нас,
 яко да во мнозей любви, вере и надежди добре поживше,
 всегда ублажаем вас,
 Феодоре и Василие добропобеднии.

Молитва священномученикам Александру Смирнову и Феодору Ремизову

О, святи́и священному́ченицы Алекса́ндре и Фео́доре! К ва́м, я́ко к неоскудева́ющему исто́чнику благода́ти Бо́жией, мы́, недосто́йнии, прибега́ем. Вы́ бо тоя́ сподо́бистеся, адама́нты ве́ры су́ще. Еще́ же и стра́шныя ра́ны и хуле́ния зло́бная нечести́вых мучи́телей претерпе́вше, увере́ние о венце́ му́ченичестем от Го́спода прия́сте и терпе́нием ва́шим, дре́вним му́чеником подража́юще, мучи́телей удиви́сте. Я́ко па́стырие Бо́жии су́ще, ре́вностно слу́жбу в земны́х хра́мех соверша́вше и моли́твою ва́шею наро́д Бо́жий укрепля́вше, бу́дите и за на́с моли́твенницы, предстоя́ще ны́не пред Престо́лом Вседержи́теля. Вы́, поне́сше тяготу́ и зно́й дневны́й, не то́кмо сло́вом, но и де́лом бы́сте свиде́телие Пра́вды Бо́жия, утверди́те и на́с во и́стине Христо́вой, не поне́сших ни тяготы́ поноше́ний, ни зно́я гоне́ний, но да бу́дем, я́ко нае́мницы единонадеся́таго часа́, ча́ющии мзду́ прия́ти от Христа́ во Ца́рствии Небе́снем. Испроси́те у Бо́га моли́твами ва́шими, святи́и страда́льцы Христо́ви, ве́ры правосла́вныя укрепле́ние, помысло́м на́шим освяще́ние, в доброде́телех преспе́яние; да да́рует О́н да́р благопотре́бен коему́ждо прося́щему предста́тельства ва́шего, да сподо́бит на́с и в ча́с кончи́ны на́шея о́ную тве́рдость ве́ры яви́ти, ку́ю же и ва́м дарова́, да со все́ми святы́ми сподо́бимся в Ца́рствии Небе́снем непосты́дно воспева́ти Его́ Пресвято́е И́мя Отца́, и Сы́на, и Свята́го Ду́ха во ве́ки веко́в. Ами́нь.

Ин тропарь благоверных князей Феодора Смоленского и чад его Давида и Константина

Иже от юности Христовы любве
прилепившеся усердно, святии
законы и оправдания Того сохраняюще,
отнюдуже и чудесными даровании обогатистеся,
исцеления источаете иже верою вас почитающих,
темже молите Христа Бога
спастися душам нашим.

Тропарь благоверных князей Феодора Смоленского и чад его Давида и Константина, на преставление

От юности вашея Христове любви прилепившеся, святии,
усердно закон и оправдания Того сохранисте,
отонудуже и чудесными даровании обогатившеся,
исцеления источаете, Феодоре, Давиде и Константине,
о верою вас почитающих,
молите Христа Бога, спастися душам нашым.

Тропарь благоверных князей Феодора Смоленского и чад его Давида и Константина, на перенесение мощей

Яко звезды многосветлыя от юности возсиявше,
осветили есте сердца верных пренесением честных мощей ваших,
во плоти, яко Ангелы на земли показастеся,
пощением насаждени бысте яко древа, при водах воздержания,
напоени струями слез ваших, и скверну омысте.
Сего ради явистеся приятелища Божия Духа,
Феодоре, и Давиде, и Константине,
молите Христа Бога, спастися душам нашым.

Ин тропарь, на преставление Феодора

Яко целитель преизряден и казатель благоприятен
мирский мятеж оставил еси и крест свой на рамо взем
и божественным житием пожил еси и воздержанием плоти украсился еси
к тебе притекающим сосуд избранный показа тя, всеблаженне Феодоре,
воспевающих твою память в псалмех и песнех, преподобне, молися о душах наших.

Ин тропарь благоверного князя Феодора Смоленского

Измлада явился еси, Богомудре княже,
Божествен сосуд невозбранен Богови,
ныне точиши нам многоцеления,
вся ереси потопляюще и спасая присно свой град
и всех верных сохраняя, и невидимо от видимых враг,
верою тя молим, преподобне отче наш, княже Феодоре,
моли спастися душам нашим.

Ин тропарь благоверных князей Феодора Смоленского и чад его Давида и Константина

Яко апостолом спричастницы и врачеве предобрии, служители Богоприятнии,
памяти вашей Божественней притекающим,
святии Богомудрии, достоблаженнии, благочестивии князи,
новоявленнии чудотворцы Феодоре и Давиде, и Константине,
сошедшеся любовию в память вашу светло празднуем
в песнех и пениих, радующеся Христа славяще, таковую благодать даровавшего вам исцелением,
граду вашему Ярославлю великое утверждение.

Тропарь благоверных князей Феодора Смоленского и чад его Давида и Константина

Измлада явистеся святии,
Богомудре Феодоре и блаженне Давиде с Константином славным,
Божественнии сосуди, избраннии Богови.
Ныне же источаете нам многа исцеления от честных мощей ваших,
вся ереси потопляюще,
и спасающе присно град свой,
и всех верных сохраняюще невредимо
от видимых и невидимых враг.
Темже верою молим вас, святии:
молите Христа Бога
в мире сохранитися нам и спасти души наша.

Кондак благоверных князей Феодора Смоленского и чад его Давида и Константина

Богомудренно преселистеся, святии,
во град, присно добродетельми цветущий,
в жизни сей приносяще Богови плоды благи,
преподобне Феодоре и блаженне Давиде с Константином славным,
и явистеся, яко многоцветущая райская древеса жизни
и яко многосветлыя звезды, в мире сияюще благодатию,
в добродетели исправивше жизнь свою,
и сего ради получисте живот вечный на Небесех.
Темже благодарственно вам зовем:
радуйтеся, всемирнии светильницы и граду нашему Ярославлю великое утверждение.

Кондак благоверных князей Феодора Смоленского и чад его Давида и Константина, на преставление

Явися велие солнце Христове Церкви,
просвещая учением светлостьми, всечестне,
яко черпалом златым от кладязя неископаннаго чудес почерпл еси от Источника неистощимаго
на успение свое приспел еси, всеблаженне Феодоре,
ныне всем даеши грехов прощение.

Ин кондак благоверного князя Феодора Смоленского

Многомудренне преселився, преподобне княже Феодоре,
в град цветущ присно плоды благия,
явился еси яко рай, паче жизни,
яко многосветлая звезда в мире сияя, в пощении исправив жизнь свою,
и ныне Того получил еси живот вечный на небесех.

Ин кондак благоверных князей Феодора Смоленского и чад его Давида и Константина, на перенесение мощей

Яко светильницы и врачеве преизряднии явистеся,
верним сердцем озаряюще добродетельми чудес ваших,
в плоти бо на земли благоугодители,
Иже во святых Прославляемому непрестанно молите о всех нас.

Кондак благоверных князей Феодора Смоленского и чад его Давида и Константина, на перенесение мощей

Явистеся светильницы всесветлии во плоти яко Ангели,
и яко жизни древеса райская,
пощением, бдением и верою возращаеми, процвели есте,
молитвами вашими небесныя благодати приемше,
врачеве крепцы явльшеся,
исцеляете недугующих души,
с верою прибегающих к вам чудотворцы славнии, Феодоре, Давиде и Константине:
молите Христа Бога, грехов оставление даровати
верою и любовию чтущым память вашу.

Тропарь святителю Феодору, архиепископу Ростовскому

От ю́ности твоея́ до́бре воспита́вся труда́ми,
воздержа́нием, посто́м и моли́твами,
чисту́ и непоро́чну сотвори́л еси́ ду́шу твою́.
Сего́ ра́ди на престо́л святи́тельства сел еси́
и, я́ко звезда́ многосве́тлая, просвеща́я ве́рных сердца́
заря́ми чуде́с твои́х, о́тче наш святи́телю Фео́доре,

и ны́не моли́ Христа́ Бо́га, да спасе́т ду́ши на́ша.

Ин тропарь святителю Феодору, архиепископу Ростовскому

От ю́ности, прему́дре, приле́жно подвиза́вся,
и извеще́нием Свята́го Ду́ха
превели́кую оби́тель воздви́же Пресвя́тей Богоро́дице
в похвалу́ Рождества́ Ея́,
струя́ми же слез твои́х безпло́тныя враги́ погрузи́л еси́
и жития́ твоего́ целому́дрием со а́нгельскими ли́ки совокупи́вся,
преподо́бне о́тче Фео́доре,

с ни́миже Христа́ Бо́га моли́
спасти́ся душа́м на́шим.

Кондак святителю Феодору, архиепископу Ростовскому

В моли́твах Го́сподеви предстоя́,
я́коже кре́пкий адама́нт во у́твари,
по вся дни и но́щи пред лице́м Бо́жиим светя́ся моли́твами,
и́хже ра́ди трудо́в Незаходи́маго Све́та сподо́бився,
но, я́ко име́я дерзнове́ние
к ро́ждшемуся от Святы́я Де́вы Христу́ Бо́гу на́шему,

Его́же моли́ непреста́нно о всех нас.

Величание святителю Феодору, архиепископу Ростовскому

Велича́ем тя,
святи́телю о́тче Фео́доре,
и чтим святу́ю па́мять твою́,
ты бо мо́лиши за нас

Христа́ Бо́га на́шего.

Тропарь святителя Феодора, епископа Ростовского и Суздальского

В молитвах бдя, сердцем же о стаде твоем выну болезнуя,
учением своим всех просветил еси, Феодоре премудре,
темже Христа Бога моли,
в день памяти твоея даровати нам велию милость.

Тропарь святителей Иоанна и Феодора Суздальских

Яко апостолом единонравных учителей Суждальския страны,
и целителей душ и телес премудрых,
и служителей Богу благоприятных,
к ракам честных мощей ваших притекающе,
ублажаем вас, святителие Богоблаженнии, Феодоре и Иоанне,
в песнех же и пениих, радующеся, славим Христа,
даровавшаго вам благодать исцелений
и граду нашему Суждалю великое в вас утверждение.

Ин тропарь святителя Феодора, епископа Ростовского и Суздальского

В молитве бдя, Горняя желая,
дольняя возненавидел еси,
и, сердцем болезнуя, выну о стаде своем печешися,
учением бо своим всех просветил еси,
Феодоре премудре, Христа Бога моли в памяти твоей
даровати нам велию милость.

Ин тропарь святителей Иоанна и Феодора Суздальских, древний

Яко апостолом единонравнии,
и учителие Суждальстей стране,
и целителие душам и телесем предобрии,
и служителие Божии благоприятнии,
к ракам честных мощей ваших притекающе,
святителю великий Иоанне и Феодоре Богоблаженнии,
сошедшеся днесь, любовию память вашу светло празднуем в песнех и пениих,
радующеся и Христа славяще,
Иже таковую благодать даровавшаго исцелений
и граду Суждалю великое утверждение.

Кондак святителя Феодора, епископа Ростовского и Суздальского

Яко велие солнце,
возсия преславная память твоя, премудре Феодоре,
в нейже подававши в бедах сущим спасение,
притекающим к тебе усердно,
благодатию, еюже облагодати тя Христос
в жизни нескончаемой.

Кондак святителей Иоанна и Феодора Суздальских

Божественных и пречестных святителей Христовых и чудотворцев Иоанна и Феодора,
вернии, поюще, да ублажим,
яко днесь, в память их притекающе к ракам мощей их,
молим многообразных нас обстояний избавити, да вопием вам:
радуйтеся, граду нашему и Церкви Христовей великое утверждение.

Ин кондак святителей Иоанна и Феодора Суздальских

Яко добродетелей учители,
молитвами вашими подаете чтущим вас любовию
добродетелей исправление
и соблазнов избавление.

Молитва святителю Феодору, епископу Суздальскому

О великий архиерею Божий, Феодоре треблаженне! Иже град Суждаль и окрестныя грады и страны святым Крещением просветивый и от тьмы неведения к свету Богоразумия приведый, первый во благодати Православныя веры нам пастырь и угодник Господень, Ангельскаго жития ревнитель и апостолов подобник, граду Суждалю защити- тель и всем, с верою к тебе притекающим, помощник велий и заступник теплый! Услыши нас, грешных и недостойных раб твоих, в час сей к тебе моление сие приносящих, помяни нас у Престола Владыки Царя Вседержителя Бога и помолися о нас, грешных, яко да избавит нас от всех бед и зол, мир же и благоденствие нам дарует. Ей, угодниче Божий и святителю Феодоре! Сохрани страну нашу, град твой Суждаль и всякий грады и веси от глада, губительства, труса и потопа, огня, меча, нашествия иноплеменных, и меэкдоусобныя брани, и от напрасныя смерти, и от нападения вражия, и от тлетворных ветров, и от смертоносныя язвы, и от всякаго зла. Буди нам помощник и заступник во всей жизни нашей, и избави нас от обидящих и ненавидящих человек, неправедно на ны востающих, и от всех видимых и невидимых сопротивлений вражиих, и спасены нас представи в День страшнаго и грознаго пришествия Господня, и сподоби нас улучити деснаго стояния во блаженном Царствии Христа Бога. Яко Тому подобает всякая слава, честь и поклонение, со Безначальным Его Отцем и Пресвятым, и Благим, и Животворящим Его Духом, ныне, и присно, и во веки веков. Аминь.

Молитва святителям Феодору и Иоанну Суздальским

О, велицыи угодницы Христовы и чудотворцы, святителие Феодоре и Иоанне! Се мы, недостойнии и грешнии, скорбьм многими угнетаемии, к вам усердно прибегаем и с упованием крепким молимся: отцы благомилостивии и благопослушливии, милостивно услышите ныне глас наш молебный, и потщитеся на помощь нашу, и, яко при жизни вашей всем скорбящим и озлобленным помощницы и утешителие бысте, тако и ныне любовь вашу к нам явите благодатным действом богоприятных молитв ваших, претворяюще скорбь нашу на радость, печаль же на утешение, вся бо можете о укрепляющем вас Христе, Егоже вернии служителие бысте, от Негоже приявше вся обетованная благая, низпослите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне, и присно, и во веки веков. Аминь.

Тропарь преподобному Феодору Санаксарскому

От юности твоея сынове Христа возлюбил еси, и токмо Господеви служити восхотев, благую часть избрал еси, яже не исхищается смертию. Единому на потребу себе предав и Жизни Подателю, от Него же сподобился еси даров божественного учительства и духовного разсуждения, окормляя всех прибегающих к тебе и ищущих души спасение, богомудре старче Санаксарский Феодоре.

Тропарь преподобному Феодору Сикеоту

Познан быв от пелен освящен
и явлься благодатей исполнен,
чудесы мир озарил еси
и демонов множество отгнал еси,
священнодетелю Феодоре,

темже о нас молися Господеви.

Кондак преподобному Феодору Сикеоту

Яко на огненную колесницу добродетельми, богоносе, возшед,
востекл еси на Небесная жилища,
яко Ангел, с человеки пожил еси
и, яко человек, со Ангелы окрест ликовствуеши.
Сего ради показался еси чудес Божественное приятелище,

Феодоре преподобне.

Тропарь великомученика Феодора

Воинствословием истинным, страстотерпче,
Небеснаго Царя воевода предобрый был еси, Феодоре,
оружиями бо веры ополчился еси мудренно,
и победил еси демонов полки,
и победоносный явился еси страдалец.
Темже тя верою

присно ублажаем.

Кондак великомученика Феодора

Мужеством души в веру оболкийся
и глагол Божий, аки копие, в руку взем,
врага победил еси,
мучеников превелий Феодоре,

с ними Христу Богу моляся не престай о всех нас.

Тропарь преподобному Феодору Студиту

Правосла́вия наста́вниче,
благоче́стия учи́телю и чистоты́,
вселе́нныя свети́льниче,
мона́шествующих Богодухнове́нное удобре́ние,
Фео́доре прему́дре,
уче́ньми твои́ми вся просвети́л еси́,
цевни́це духо́вная,

моли́ Христа́ Бо́га спасти́ся душа́м на́шим.

Кондак преподобному Феодору Студиту

По́стническое и равноа́нгельное житие́ твое́
страда́льческими уясни́л еси́ по́двиги
и А́нгелом совсе́льник, Богоблаже́нне, яви́лся еси́, Фео́доре.
С ни́ми Христу́ Бо́гу моля́ся

не преста́й о всех нас.

Молитва преподобному Феодору Студиту

О, свяще́нная главо́, преподо́бне о́тче, преблаже́нне а́вво Фео́доре! Не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу! Помяни́ ста́до твое́, е́же сам упасл еси́, и не забу́ди посеща́ти чад твои́х. Моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́; не премолчи́ за ны ко Го́споду, и не пре́зри нас, ве́рою и любо́вию чту́щих тя. Помина́й нас недосто́йных у Престо́ла Вседержи́теля, и не преста́й моля́ся о нас ко Христу́ Бо́гу: и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со А́нгельскими во́инствами, со Безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся. Ве́дуще у́бо тя вои́стинну и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в, возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Бо́гу на́шему Иису́су Христу́; Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Тропарь великомученика Феодора Тирона

Велия веры исправления,
во источнице пламене, яко на воде упокоения,
святый мученик Феодор радовашеся:
огнем бо всесожжегся,
яко хлеб сладкий Троице принесеся.

Того молитвами, Христе Боже, спаси души наша.

Кондак великомученика Феодора Тирона

Веру Христову, яко щит, внутрь приим в сердце твоем,
противныя силы попрал еси, многострадальче,
и венцем Небесным венчался еси вечно, Феодоре,

яко непобедимый.

Молитва святому великомученику Феодору Тирону

О, Преславне, великомучениче Феодоре Тироне. Услыши моление нас верных, величающих тя и в смирении своем взывающих к тебе от всея души. От юности показавый пламенную веру во Христа Господа и ради нея жизнь свою положивый, подаждь и нам молящимся тебе душевныя силы, во еже блюсти во вся дни чистоту правыя веры. Запечатлевый мученичеством исповедание веры в пещи огненней, буди нам образом в ревности проповедывания Истины Христовой. Оградивый верных от греха язычества и отступничества, соблюди и нас чистыми от еретических козней и всякого диавольскаго навождения. О, Преблаженне, великомучениче Феодоре, своим предстательством у Престола Всевышняго умоли Господа Бога, да подаст нам благодатныя силы, во еже направити пути жизни нашея по Слову Божию во спасение душ наших. Яко да твоими молитвами получивше благодать и милость, прославим всех благих Источника и Дароподателя Бога, Единаго, в Троице Святей Славимаго, Отца и Сына и Святаго Духа, ныне и присно и во веки веков. Аминь.

Тропарь благоверного князя Михаила Черниговского и боярина его Феодора

Троичнаго Божества осиянием просветився,
страстотерпче великий княже Михаиле,
с премудрым болярином ти Феодором,
самозванна к подвигом устремистася,
сквозе огнь не идоста,
кусту же и идолом не поклонистася, но оплеваста
и нечестиваго царя обличиста,
Христа же Единаго от Троицы Бога Суща исповедаста.
И Того ради кровей своих струями обагристася, славная.
Темже и венцы от Него победная прияста,
и нас свыше назираета,
молим вас, святыя, молите Того,
яко да вашими молитвами избавит нас от всяких обстоящих ны зол
и подаст нам вся благая,
Иже Един Сый прославляемый во святых Своих.

Кондак благоверного князя Михаила Черниговского и боярина его Феодора

Солнца мысленнаго праведнаго — Христа
озарився сиянием, пребогате Михаиле,
видимому солнцу не поклонился еси
и твари паче Творца не послужил еси
и нечестие обуздал еси,
ярости царя не убоявся
и крове своей обагрением
Христови предстал еси, радуяся.
И ныне в пренесении мощей твоих
нас свыше назирай и Христа Бога моли,
молимся яко спастися нам
и Православию непоколебиму пребыти,
Отечеству нашему соблюстися во всем
молитвами твоими, святе,
по велицей Его милости.

Ин кондак благоверного князя Михаила Черниговского и боярина его Феодора

Верою укрепльшеся, святии, мучения претерпесте
и кровьми своими погасисте пламень сопротивных безбожия,
Христа же исповедасте, с Отцем и Духом,
Михаиле и Феодоре, Его молите за всех нас.

Тропарь благоверного князя Феодора

От благочестиваго корене отрасль благочестивая прозябл еси
и, скончався в юности, лета долга твоими добродетельми исполнил еси,
благоверный княже Феодоре,
сего ради Владеющему временами молимся,
да молитвами твоими подаст нам долготу лет

и низпослет стране нашей велию и богатую милость.

Кондак благоверного князя Феодора

В благочестии рожденна,
в страсе Божии воспитана,
в житии целомудрие стяжавшаго,
по успении же нетлением телесе просиявшаго,
благовернаго князя Феодора во святых почитая,
смиренно молимся Тебе, Всесильный Владыко,
да и во веки прославляеши святыми Твоими

страны наша российския.

Молитва благоверному князю Феодору Новгородскому

Святы́й благове́рный вели́кий кня́же Фео́доре! Ты от кня́жеския кро́ве происше́д в мир сей, кня́жескую сла́ву навсегда́ име́л еси́ насле́довати, и вся кра́сная ми́ра сего́ бы́ша в руку́ твоею́, егда́ на земли́ сей обита́л еси́. Но ты, а́ще и в млады́х ле́тех сконча́лся еси́, но испо́лнил еси́ ле́та до́лга и душе́внаго сопоста́та, еще́ млад сый, победи́ти в си́лах был еси́. И чистоту́ в житии́ твое́м соблю́л еси́, чесо́ ра́ди Кре́пкий во бра́нех Госпо́дь и причте́ тя, я́ко до́браго во́ина, к Безпло́тному Своему́ во́инству в Небе́сных оби́телех, Росси́ю же защити́ руко́ю бра́та твоего́, свята́го благове́рнаго вели́каго кня́зя Алекса́ндра Не́вскаго. Сего́ ра́ди мо́лим тя, Небе́сный во́ине Христо́в: даждь и нам позна́ти, сколь ничто́жно и преходя́ще все жите́йское и сколь бли́зок всегда́ до́лжен бы́ти се́рдцу на́шему Бог наш, да вы́ну помышля́ем о Го́рнем, не о земно́м, да неусы́пно и́щем ве́чнаго Небе́снаго оте́чества, да прославля́ем Бо́га жи́знию и дела́ми на́шими и с му́жеством отража́ем стре́лы по́хоти, греха́ и собла́знов. Ты из среды́ волну́ющагося душе́вных страсте́й мо́ря к ти́хому приста́нищу в кра́ткое вре́мя безбе́дно дости́гл еси́, и, а́ще устремля́хуся ми́ра сего́ во́лны, е́же потопи́ти неви́нную ю́ность твою́, но ничто́же успе́ша, ко́вчег бо тебе́ бысть чистота́, корми́ло – Правосла́вная ве́ра, ко́тва – тве́рдая на Бо́га наде́жда, ве́трило – любо́вь к Бо́гу и бли́жнему. Мо́лим тя, уго́дниче Бо́жий, усво́й и нам эти сво́йства своя́ и доброде́тели, охлажда́й по́хоти се́рдца на́шего, помога́й нам в борьбе́ со страстьми́ на́шими, исхода́тайствуй нам у Го́спода реши́тельное отвраще́ние от поро́ков, постоя́нство в доброде́тели, терпе́ние в бе́дствиих, великоду́шие в го́рестех, тве́рдую на Бо́га наде́жду во всех обстоя́тельствех настоя́щия жи́зни, любо́вь к враго́м, жела́ние добра́ всем, лю́бящим и ненави́дящим нас. Ты, уве́рен быв, я́ко златотка́нныя ри́зы о́бщему подлежа́т тле́нию, потща́лся еси́ в животе́ твое́м из доброде́телей истка́ти себе́ ри́зу нетле́ния, в не́йже ны́не красу́ешися, внуши́ и нам, да отвраща́емся от всех мирски́х удово́льствий, от вся́кия плотски́я по́хоти, от всея́ земны́я сла́вы и от вся́каго тле́ннаго сокро́вища, да презира́ем обольще́ние ро́скоши, и гнуша́емся обая́ния ле́сти и поро́ка, и да ра́дуемся, егда́ те́рпим за Христа́ лише́ния, уничиже́ния, гоне́ния, презре́ния, клевету́ и озлобле́ние. Горя́ху к тебе́, святы́й кня́же, любо́вию росси́йския сы́нове, ви́дяще тя, от благочести́ваго ко́рене о́трасль благочести́вую, и великоле́пный брак тебе́ на земли́ гото́вляху сро́дницы и дру́зи твои́, не ве́дуще Бо́жия Про́мысла, я́ко Бог благоволи́л избра́ти, во е́же тебе́ безбра́чну служи́ти на бра́це Сы́на Его́ Единоро́днаго, и ты, святы́й благове́рный кня́же, предвари́в нас в Ца́рстве благода́ти, привлецы́ и нас свое́ю любо́вию в Ца́рство Небе́сное, бу́ди для нас ору́дием человеколю́бия и бла́гости Бо́жией, отклоня́й от нас и́стинная бе́дствия, утеша́й нас в го́рестех и печа́лех, укрепля́й свои́м предста́тельством у Го́спода си́лы ве́рныя на доброде́лание во сла́ву и́мене Бо́жия и в преспеяние Ца́рства Христо́ва, да процвета́ют здра́вием к благоде́нствию и возраста́ют от си́лы в си́лу и от сла́вы в сла́ву вси наро́ди земли́ Росси́йския, да бу́дут всегда́ одушевле́ни благоче́стием, пра́вдою, му́жеством, пре́данностию оте́честву и все́ми доброде́тельми, да и мы вме́сте с тобо́ю удосто́имся превозноси́ти бла́гость, любо́вь и милосе́рдие Еди́наго, в Тро́ице Святе́й сла́вимаго Бо́га, Отца́ и Сы́на и Ду́ха Свята́го, ны́не, и при́сно, и во ве́ки веко́в. Ами́нь.